O conxunto histórico tudense, o segundo en importancia e tamaño de Galicia, é o máximo expoñente do patrimonio tudense. As rúas vellas de Tui gardan auténticos tesouros mais aló das impoñentes construcións ou das pequenas vivendas que se agrupan nel. Escudos, brasóns, inscricións fan do conxunto histórico de Tui, declarado Ben de Interese Cultural, un lugar para coñecer, aprender e descubrir. Pero outros moitos puntos do centro urbano e das parroquias atesouran outros elementos destacados moitos deles vinculados á cultura popular e do patrimonio relixioso.
Mañá abre o prazo de presentación de solicitudes das axudas á rehabilitación de edificios e vivendas no ámbito da Área de Rehabilitación do Conxunto Histórico de Tui correspondentes á Fase 15ª. As bases poden consultarse dende hoxe en tui.gal, na sede electrónica do Concello de Tui e no BOPPO.
Bases convocatoria axudas rehabilitación de edificios e vivendas no ámbito da ARI Fase 15
Un ano máis, e como cada mes de setembro, o novo curso arrincará nas cidades da Red de Juderías coa celebración das Xornadas Europeas da Cultura Xudía, un ciclo de eventos no que participan 37 países europeos para poñer en valor a importancia da herdanza da cultura xudía e o seu patrimonio. Cada ano, os organizadores das xornadas seleccionan unha temática central que serve como punto focal para debates, actuacións e diversas actividades culturais.
"Evolución urbana de Tui: do burgo altomedieval á cidade de Fernando II" é o título da visita a cargo de Suso Vila, doutor en Historia da Arte pola USC, que pechará o próximo martes, 20 de agosto o ciclo “Coñece o noso patrimonio” que este verán permitiu o achegamento ao patrimonio tudense.
O próximo martes, 13 de agosto, a prestixiosa historiadora da arte Carmen Manso Porto realizará unha visita guiada á igrexa tudense de San Domingos. Forma parte do ciclo “Coñece o noso patrimonio” que con gran éxito de público está realizando neste verán o Instituto de Estudios Tudenses coa colaboración do Concello de Tui. Esta visita comezará ás 20.00 horas na propia igrexa dominica.
Mañá xoves, 8 de agosto, terá lugar a cuarta visita do ciclo de visitas guiadas que organiza o Instituto de Estudios Tudenses, nesta ocasión centrada na “Transformacións da cidade de Tui a través dos seus recintos amurallados” e que estará a cargo de Juan José Perles Fontao, arqueólogo. A visita dará comezo ás 20.30 horas na Praza do Concello.
O 50% das persoas que en xullo realizaron o Camiño Portugués comezaron o seu percorrido a Santiago en Tui. En concreto dos 11.519 peregrinos e peregrinas que optaron por esta vía xacobea 5.622 elixiron Tui para comezar o Camiño de Santiago. Deste xeito a cidade foi o primeiro punto de partida do Camiño Portugués, segundo de Porto con 2.095 peregrinos e Valença con 1.937.
Este mércores, 31 de xullo, a partir das 20.30 h terá lugar unha nova visita do ciclo “Coñece o noso patrimonio” que organiza o Instituto de Estudios Tudenses coa colaboración do Concello de Tui. Esta visita, que se iniciará na fachada norte da catedral, na rúa Párroco Manuel Rodríguez Vázquez, estará a cargo da profesora de historia da arte da Universidade de Santiago de Compostela, Marta Cendón Fernández. Centrarase no proceso construtivo da catedral tudense e a pegada no exterior do templo catedralicio das diversas etapas deste proceso.
Mañá martes, 23 de xullo, terá lugar a segunda visita do ciclo “Coñecendo o noso patrimonio” organizado polo Instituto de Estudios Tudenses. Nesta ocasión estará centrada na “Arqueoloxía do Alto do Coello e Rozacús” na parroquia de Randufe. Esta visita estará a cargo do arqueólogo Benito Vilas Estévez, que foi o responsable da intervención realizada neste espazo no ano 2020, e que sinala que este xacemento ten a singularidade de presentar exemplos de diferentes épocas nun mesmo espazo: hai figuras xeométricas, naturalistas e ata medievais.
O próximo luns comeza “Coñece o noso patrimonio”, o programa de visitas guiadas que organiza o Instituto de Estudios Tudenses, coa colaboración do Concello de Tui, para a difusión do amplo acervo patrimonial que atesoura a cidade. Estará a cargo de especialistas do propio Instituto.
