Mañá xoves, 20 de novembro, ás 19,30 horas celebrarase unha nova conferencia do ciclo “Sobredo, 103 anos despois”. O  médico Martiño Noriega presentará o seu libro “Os médicos tamén enferman”. Estará acompañado polo editor do libro Henrique Alvarellos e pola presidenta do Instituto de Estudios Agrarios Mártires de Sobredo, IEAMSo, Marga do Val. Celebrarase no Espazo socio-cultural da rúa Camilo José Cela.

Que debemos ter en conta á hora de realizar unha compra en liña, como identificar fraudes ou estafas dixitais, ou como protexer xoguetes e dispositivos conectados serán algunhas das claves que se ofrezan na charla “Prepárate para un Nadal Ciberseguro” que se vai celebrar o mércores, 3 de decembro, de 17 a 18.30 h na aula CEMIT de Tui.

Trátase dunha actividade organizada pola Axencia para a Modernización Tecnolóxica de Galicia contando neste caso coa colaboración do Concello de Tui.

O Teatro Municipal de Tui acolleu esta mañá a primeira das proxeccións deste curso do programa “O cine nas Aulas”.  A través do Servizo de Prevención de Drogodependencias o Concello de Tui, oferta esta actividade aos centros educativos de Primaria e Secundaria na que empregando o cine coma ferramenta se abordan diferentes temáticas incidindo na prevención.

Un teatro comprometido, actual, fresco e con humor. Así teñen sido dende 2013 as propostas teatrais de A Panadaría, a compañía formada por Areta Bolado, Noelia Castro e Ailén Kendelman que este sábado se despide en Tui coma compañía. Hoxe no escenario do teatro tudense, onde este sábado representarán a derradeira función de “As que Limpan” falaron do percorrido deste doce anos.

O Concello de Tui segue promovendo o coñecemento da traxectoria do médico e filósofo tudense Francisco Sánchez, de quen se cumpre este domingo, 16 de novembro, o 402 aniversario do seu falecemento na cidade francesa de Tolosa. Faino coa tradución ao galego das súas principais.

O próximo luns, 17 de novembro, ás 11 h terá lugar no Teatro Municipal de Tui a presentación do peche de xira da obra “As que limpan” e da despedida compañía A Panadaría. Comparecerán ante os medios Areta Bolado, Noelia Castro e Ailén Kendelman.

A Panadaría actuará o sábado, 22 de novembro, ás 20 h no Teatro Municipal de Tui pechando a xira de “As que limpan”  que iniciaron en Tui en 2022.

“Singularia” de Magia en la Manga é o espectáculo que mañá venres se vai estrear no Teatro Municipal de Tui. Tras un ano de intenso traballo e unha semana de residencia artística neste espazo escénico a maga Sara Rodríguez levará a cabo trucos que maxia que non se ven habitualmente. Farao todo cunha coidada posta en escena, con material creado a propósito para este evento, con dramaturxia e unha fermosa e sorprendente escenografía.

Mañá xoves, 13 de novembro, ás 11 h, no Teatro Municipal de Tui terá lugar a presentación do espectáculo “Singularia” de Magia en la Manga que este venres se estreará en Tui dentro da programación de Outono.

Participarán na presentación Sonsoles Vicente, concelleira de Cultura; Sara Rodríguez, intérprete; Gonzalo Albiñana, director, e Óscar Fernández representante da compañía.

“Crebas e peixes” é o título da exposición que mañá xoves, 13 de novembro, ás 19.30 h será inaugurada na Sala Municipal de Exposicións do Concello de Tui, no Edificio “Francisco Sánchez”. Trátase dunha mostra singular que presenta unha escolma de pinturas de Xavier Álvarez Blázquez es as pequenas “esculturas” de Alfonso Álvarez Cáccamo, falecido en marzo do pasado ano.

Así a exposición reúne os peixes pintados de Xavier Álvarez Blázquez e as crebas, os restos de naufraxios ou cargas dos barcos que o mar arrastra ata a costa, rescatadas e transformadas por Alfonso Álvarez Cáccamo.

O Instituto de Estudos Agrarios Mártires de Sobredo (IEAMSo), no marco do Mes da Memoria que promove o Concello de Tui, organiza este xoves, 6 de novembro, ás 19.30 h un coloquio no que intervirá a xornalista Tereixa Navaza para tratar o tema  “A prensa desde Sobredo á volta de Castelao”. Terá lugar no Espazo Sociocultural da rúa Camilo José Cela.