Trazar as liñas mestras da ordenación do territorio, e autorizar as actuacións permitidas en cada ámbito son as tarefas básicas do Urbanismo municipal, pero mais aló deste labor fundamental en calquera cidade, o urbanismo busca tamén conseguir que a vida dos cidadáns se desenvolva nun entorno amable e cómodo. Unhas rúas cada vez mais humanizadas, no sentido mais estrito da verba, pensadas, deseñadas e realizadas para o día a día das persoas. O conxunto Histórico de Tui co seu Plan Especial é unha das máximas preocupacións urbanísticas da cidade. Buscar que o casco urbano creza de xeito ordenado e atractivo e que o rural sexa un espazo harmonioso e que conserve o seu patrimonio é misión fundamental do urbanismo municipal.
O Goberno Municipal do Concello de Tui vén de adxudicar o proxecto para a execución da primeira fase de humanización da rúa Colón, por un importe de 314.000 euros. É un dos proxectos do Plan Concellos da Deputación do ano 2018. As obras contemplarán o ensanchamento de beirarrúas, pavimentado, colocación de mobiliario urbano e zonas verdes.
Este mércores, 1 de xullo, abriranse os parques infantís ao longo do municipio de Tui cumprindo as medidas de seguridade establecidas debido á pandemia da COVID-19. Explican dende a concellería de Parques e Xardíns que na tardanza na apertura dos parques primou en todo momento a seguridade dos usuarios, e axustarse á nova normativa en vigor.
Os Parques Infantís de Tui permanecen pechados e precintados polo que non se pode acceder aos mesmos.
O Concello de Tui vén de ser o primeiro concello en balizar a súas praias neste verán. Está xa colocado o balizamento da praia de Areeiros en Guillarei e mañá acometerase o do Penedo en Caldelas, sinalizando deste xeito a zona de baño.
O Concello de Tui vai ampliar o prazo para solicitar as axudas da ARI, Área de Rehabilitación Integral do Conxunto Histórico, que rematou inicialmente este martes, 19 de maio. Tendo en conta a declaración do estado de alarma dende o Concello decidiuse ampliar este prazo, un proceso que está agora en tramitación administrativa, co obxectivo de que poida ser maior o número de persoas propietarias de inmobles nesta zona da cidade as que se poidan beneficiar destas axudas.
Esta semana abríronse de novo os xardíns de Troncoso tras as obras de acondicionamento acometidas nos últimos meses. A actuación levouse a cabo co financiamento do Plan Concellos 2017 da Deputación de Pontevedra.
Este espazo público situado no Paseo Familia Álvarez Blázquez, que comunica o céntrico Paseo da Corredoira coa rúa Antero Rubín, foi obxecto dunha actuación que o dotou dun novo deseño para potenciar a súa condición de lugar tranquilo e crear un espazo sensorial coa combinación de plantas elixidas. Instalouse amais un sistema automático de rego.
O Concello de Tui vén de acordar unha serie de medidas para previr o contaxio por Coronavirus. Estas decisións adoptáronse por unanimidade na xunta de portavoces celebrada este mediodía na casa do concello. A duración ou modulación das medidas adoptadas se tomará de acordo coas directrices establecidas polas autoridades sanitarias competentes.
Así pecharanse as instalacións municipais de carácter cultural e deportivo dende mañá e suspéndese a programación propia.
O Concello de Tui convocou un concurso de ideas de Reordenación da Fronte Fluvial do río Miño en Tui, en colaboración co COAG, o Colexio Oficial de Arquitectos de Galicia. Presentáronse 22 propostas.
Bases reguladoras e convocatoria pública para solicitar axudas á rehabilitación de edificios e vivendas no ámbito da Área de Rehabilitación do Conxunto Histórico de Tui publicadas no BOPPO o martes, 18 de febreiro de 2020.
O prazo para solicitar as axudas será de 3 meses a contar dende o 19 de febreiro ata o 19 de maio de 2020.
Até o próximo 10 de novembro está en exposición pública o Inventario de Vías e Camiños Municipais do Concello de Tui. A corporación municipal de Tui aprobou no pleno ordinario, do 26 de setembro, establecer un novo período de información pública deste documento, un acordo que o pasado xoves día 10 foi publicado no Boletín Oficial da Provincia. O obxectivo é lograr que o documento que se aprobe definitivamente sexa o máis axustado posible á realidade.
