As intensas choivas rexistradas na xornada de onte mércores, 18 de outubro, provocaron o desprazamento de preto de 50 centímetros dun dos muros das escaleiras que van dende a praza da Estrela até o Paseo Fluvial.  Por seguridade vénse de vallar o tramo do paseo fluvial situado fronte á praza da Estrela ante o risco de derrube do muro das escaleiras.

Prégase respectar o vallado ante o risco que existe na zona.

O Concello de Tui humanizará a rúa Augusto González Besada e a Corredoira Sur, incluíndo a praza da Inmaculada. Deste xeito, reunificarase a rúa Augusto González Besada, a praza da Inmaculada e a Corredoira nunha plataforma única.

O Concello de Tui vén de reforzar a iluminación en diversas rúas do centro urbano da cidade dando resposta á demanda da veciñanza deste zona. En total, substituíronse 84 puntos de luz nas rúas Rosa Bahamonde, Foxo, travesía Foxo, en todo o Paseo da Corredoira e na rúa Ordóñez.

O próximo luns comezarán as obras para a instalación de catro novas marquesiñas noutras tantas paradas de autobús en Areas, Randufe, Pazos de Reis e Guillarei en puntos de entrada ao centro urbano. O Concello de Tui vén de adxudicar o proxecto para a renovación e colocación destes elementos, unha actuación que será financiada con fondos propios.

O Concello de Tui vén de renovar estes días catro novas marquesiñas en tres parroquias Pexegueiro, Paramos e Caldelas. 

Esta actuación súmase á realizada o pasado mes de novembro en Rebordáns, Pazos de Reis, Baldráns, Caldelas, Malvas e Paramos.

Deste xeito o goberno municipal, con fondos propios, optou por renovar estes elementos ante o mal estado de conservación que presentaban moitos deles.  As novas marquesiñas foron construídas e instaladas por operarios municipais.

O Concello de Tui foi galardoado con dúas Flores de Honra no Certame Vila en Flor 2022. Trátase da primeira ocasión na que o concello recibe esta segunda flor, unha distinción para a que o xurado valorou positivamente as actuacións en materia de compostaxe, educación ambiental e as obras de recuperación de espazos para a veciñanza.

O Concello de Tui vén de renovar as marquesiñas nas parroquias de Rebordáns, Pazos de Reis, Baldráns, Caldelas, Malvas e Paramos, utilizadas polo alumnado que emprega o servizo de transporte escolar para agardar aos autobuses que diariamente os levan aos seus centros educativos.

Ante o mal estado de conservación que presentaban estes elementos, o concello decidiu levar a cabo renovación destas marquesiñas con fondos propios, sendo realizadas e instaladas polos operarios municipais.

Antes de finais de ano está previsto o inicio das obras nas rúas Augusto González Besada e Lugo dentro do proceso de transformación do centro urbano tudense cara unha mobilidade amable coas persoas, mellorando a accesibilidade e a estética. Estás actuacións están tamén en liña cos obxectivos fixados no Plan de Acción da Axenda Urbana e coa Axenda 2030.

O CEIP de Guillarei ten sido obxecto tamén ao longo das últimas semanas de diversas obras de mellora dentro das actuacións que o concello de Tui está a realizar nos centros educativos con fondos propios.

As obras executadas neste centro de Guillarei este verán consistiron na construción dunha nova rampla de acceso para o parque público que se atopa a carón do edificio, e tamén se procedeu ao pintado de aulas, así como de lixado e tamén pintado de pasamáns nas zonas comúns do centro  educativo.

O Consorcio de Augas do Louro iniciou este luns as obras de renovación de equipos de dosificación de reactivos na potabilizadora de As Chans, en Tui.