O Concello de Tui reforza a coordinación para a prevención e actuación ante incendios forestais
Esta semana celebrouse unha reunión con Comunidades de Montes, Garda Civil, Policía Local e Protección Civil
O Concello de Tui reforza a coordinación para a prevención e actuación fronte aos incendios forestais. Con este obxectivo, esta semana, celebrouse unha reunión de traballo, no salón de sesións da casa do concello, que contou coa participación do alcalde, Enrique Cabaleiro, que interrompeu as súas vacacións para asistir á reunión, da alcaldesa en funcións, Ana Núñez, dos concelleiros Rafael Estévez e Sonsoles Vicente, persoal técnico municipal, representantes da Garda Civil, Policía Local, Protección Civil e das comunidades de montes tudenses.
O obxectivo principal desta reunión foi avanzar na mellora da cooperación institucional e social, reforzando tanto a prevención como a capacidade de resposta ante posibles emerxencias. Neste sentido, solicitouse ás Comunidades de Montes unha listaxe actualizada dos recursos humanos e materiais dispoñibles (pozas de auga, motobombas, etc.), co fin de elaborar un mapa conxunto dos medios municipais e remitilo á Consellería do Medio Rural.
Para dar cumprimento á Lei de Incendios de Galicia, o Concello de Tui conta cunha enxeñeira técnica forestal encargada da identificación de parcelas, da elaboración de informes técnicos e da colaboración na tramitación dos expedientes de xestión da biomasa. Este traballo enmárcase no Plan Municipal de Prevención e Defensa contra os Incendios Forestais, aprobado en 2024, e desenvólvese no marco do convenio Xunta–FEGAMP–SEAGA.
O Concello fai un chamamento á veciñanza para que se informe sobre a situación das súas parcelas e colabore comunicando calquera parcela sen xestionar situada nas faixas de protección, a fin de iniciar o trámite correspondente.
Ademais, o Concello mantén un convenio con Medio Rural para a xestión das brigadas forestais, que realizan labores de vixilancia, defensa e prevención.
Neste encontro acordouse establecer canles de comunicación directa entre Comunidades de Montes e Garda Civil para axilizar a transmisión de información e coordinar actuacións inmediatas en caso necesario.
A alcaldesa en funcións, Ana Núñez, agradeceu a participación de todas as entidades na reunión convocada no concello salientando a importancia da coordinación neste eido. Así sinalou que “aínda que a competencia en prevención e extinción de incendios é da Xunta, a responsabilidade é de todos”.
Ana Núñez fixo fincapé tamén en que “a prevención é a nosa ferramenta más eficaz” anunciando a convocatoria de reunións periódicas coas Comunidades de Montes para avanzar na planificación e na xestión preventiva, indicando que “este é un labor clave para garantir seguridade da cidadanía e do territorio”.
Neste encontro o cabo da Garda Civil responsable das operacións e investigación de incendios forestais realizou unha análise da situación actual, destacando que “Tui atópase en boa posición, e agardamos que continúe así”. Solicitou a colaboración activa das Comunidades de Montes en tarefas de prevención.