O pavillón deportivo da Macoca, en Pazos de Reis, conta con vestiarios renovados tras a reforma integral dos mesmos realizada polo Concello de Tui.  Esta actuación, xunto a outras obras complementarias contou cun financiamento de 184.017,41€ a través do II Plan Extraordinario de Infraestruturas Deportivas da Deputación de Pontevedra.

Mañá mércores, 23 de setembro, ás 11.00 horas, realizarase o acto de inauguración dos novos vestiarios e obras complementarias realizadas no Pavillón Deportivo da Macoca, en Pazos de Reis, financiadas ao abeiro do II Plan Extraordinario de Infraestruturas Deportivas da Deputación de Pontevedra.

Cunha festa de disfraces e distintos xogos rematou  onte o Campamento de Verán do Concello de Tui celebrado ao longo dos meses de xullo e agosto no pavillón municipal Gustavo Rodríguez e noutros espazos como a piscina municipal, a praia de Areeiros, ou as rúas da cidade.

Ao longo das catro quendas do Campamento, máis de 500 nenos e nenas, 140 por quenda, gozaron das actividades realizadas con xogos de auga, piscina, piragüismo, obradoiros para pintar a camiseta, xincanas, festa da escuma, partidos de brilé, e moito máis.

O mellor balonmán galego cítase en Tui este domingo na disputa das finais da Copa e da Supercopa Galicia de Balonmán masculino e feminino.

Estes eventos, organizados pola Federación Galega de Balonmán, en colaboración co Concello de Tui, Deporte Galego da Xunta de Galicia, a Deputación de Pontevedra e o Club Balonmán Tui, reunirán en Tui aos mellores  oito equipos galegos nas categorías masculina e feminino, así coma a toda a afección galega deste deporte. A paixón polo balonmán vivirase dentro e fóra da pista en catro encontros do máximo nivel.

Hoxe venres 28 de agosto, ás 12.30 horas, no Espazo Sociocultural da rúa Camilo José Cela, terá lugar a presentación das finais da Copa e Supercopa Galega de Balonmán, que a Federación Galega de Balonmán, en colaboración co Concello de Tui, Deporte Galego da Xunta de Galicia, a Deputación de Pontevedra e o Club Balonmán Tui, organizará este domingo 30 de agosto, no Pavillón Deportivo Municipal Gustavo Rodríguez de Tui. Disputaranse ás 11.00 e as 13.00 horas no caso das finais da Copa Galicia e ás 17.00 e 19.00 horas, no caso das finais da Supercopa Galicia.

El Chamo, actual campión de España de doma vaqueira, e Rafael Arcos actuarán por vez primeira en Galicia. Será o próximo luns ás 12.45 h na Concentración Cabalar de San Bartolomeu.  Esta secular cita volverá a converter a Tui en referente no mundo equino en Galicia cun amplo programa ao longo da mañá que comezará coa apertura da concentración ás 8 h. Este tradicional evento reunirá a centos de persoas para participar no amplo programa previsto.  

O campión olímpico, Carlos Pérez ‘Perucho’, e os campións do Mundo José Ramalho, Adrian Boros, ZSofia Czéllai-Voros, Tania Fernández e Manu Garrido forman parte dos 402 deportistas que este sábado, 22 de agosto, van participar no 55 Descenso Internacional do Miño. Esta histórica proba mantén unha participación similar a edicións anteriores reunindo a 41 clubs de Hungría, Portugal, Madrid e Galicia con 300 embarcacións. Nesta ocasión non hai un barco favorito para a vitoria absoluta xa que son varias as embarcacións k2  que loitarán por cruzar en primeiro lugar a liña de meta.

Mañá mércores, 19 de agosto, ás 12.00 horas, na rúa Olímpicos Tudenses, ao carón do Centro Municipal de Piragüismo Quique Míguez, terá lugar a presentación do LV Descenso Internacional do Miño.

O río Miño marca a identidade de Tui, a súa paisaxe, e as súas xente e tamén as súas festas. Mañá sábado o Miño é protagonista coa súa festa na que piragüismo, gastronomía e música se suceden ao longo de doce horas en escenarios coma a ribeira de Caldelas, o propio río, a praia de Areeiros, a rúa Olímpicos Tudense, e a rúa Compostela.