Tui mostra gran dinamismo no eido da cultura, innumerables actividades o longo de todo o ano, enchen o calendario de citas de gran interese para tanto para os veciños como para os visitantes. As asociacións culturais das parroquias, os grupos de música tradicional, os coros e outros tipos de asociacións xunto co Concello conforman cada ano unha paisaxe chea de actividades de todo tipo. O teatro Municipal do edificio Francisco Sánchez e o escenario de boa parte delas, obtendo ano a ano cifras de espectadores propias de cidades de maior tamaño. Exposicións, festivais de música e cine, feiras, … fan que a cultura teña en Tui un valor excepcional.
A Biblioteca Pública Municipal de Tui acolle este mércores, 24 de maio, ás 18 h a representación de “O traxe novo do rei” da man da compañía de monicreques Tarabelos Teatro. É un espectáculo para público infantil recomendado a partir dos 3 anos. Está baseado nun conto clásico de Hans Christian Andersen.
Este mércores, Día das Letras Galegas, celébrase a XXIV Feira do Libro Galego, no Paseo da Corredoira. Participarán as librarías Iris e Nobel con trece postos de exposición e venda de libros, nos que haberá un 10% de desconto.
A concellería de Ensino e Cultura, que dirixe Sonsoles Vicente, elaborou un amplo e variado programa de actividades a celebrar ao longo da xornada para dinamizar esta feira do libro e para a promoción das nosas letras, a cultura e a lingua de Galicia nesta celebración do 17 de maio.
A casa do concello de Tui acolleu esta mañá a presentación da 4ª edición do MUMI que se vai celebrar do 21 ao 24 de setembro na Eurocidade Tui-Valença.
Mañá xoves, 11 de maio, ás 11 h ES na sala de reunións da casa do concello de Tui terá lugar a presentación do IV Encontro Profesional de Música Galicia - Portugal, MUMI.
Na presentación participarán Enrique Cabaleiro, alcalde de Tui, Jose Manuel Carpinteira, presidente da Cámara Municipal de Valença, Carmela Silva, presidenta da Deputación de Pontevedra, Jacobo Sutil, director da Axencia Galega das Industrias Culturais (AGADIC), Ánxela Vila e Diana Martins, representantes do MUMI en Galiza e Portugal.
Ao longo desta semana os nenos e nenas da Escola Infantil “A Galiña Azul” de Tui visitan a Biblioteca Municipal tudense para coñecer as súas instalacións e participar na lectura dun conto por parte do persoal da biblioteca.
Previamente foi realizado o carné da Biblioteca a todo o alumnado o que lle da acceso aos servizos bibliotecarios, especialmente ao préstamo domiciliario de libros. Deste xeito, todos os rapaces e as rapazas participantes nesta actividade levan unha obra, que eles mesmos escolleron, para a lectura no seu domicilio.
A Biblioteca Municipal de Tui acollerá este mércores, 10 de maio, ás 20 h, a presentación do libro “Canto de emigración. Historia da música de Teódulo R. Paramos”. Esta actividade forma parte do programa “Tui en Letras” que promove a concellería de Ensino e Cultura do Concello de Tui en colaboración coa Deputación Provincial de Pontevedra.
Andrea Zermeno e David Quinteiro amosan, até o 1 de xuño, na Sala de Exposicións Municipal, no edificio Francisco Sánchez, a mostra “Donde nunca TuiYo”. A concelleira de Cultura, Sonsoles Vicente, acompañou esta tarde a Andrea Zermeno e David Quinteiro na apertura da mostra.
Do 4 de maio ao 1 de xuño pódese visitar na Sala Municipal de Exposicións, no edificio Francisco Sánchez, a mostra “Donde Nunca Tuiyo” de Andrea Zermeno e David Quinteiro.
Estes dous novos artistas tudenses que ofrecen unha novidosa exposición que mestura fotografía, pintura e debuxos. “Donde nunca Tuiyo” é un proxecto de deformacións fotográficas.
A exposición abre en horario de luns a venres de 9 a 14 h e de 16 a 21 h e os sábados de 9 a 13 h.
A Biblioteca Municipal de Tui acolle mañá mércores, 3 de maio, ás 18 h unha actividade de contacontos a cargo de Raquel Queizás co seu espectáculo “O eco das pedras”. Esta actividade combina narración oral con manipulación de obxectos, monicreques e proxeccións. Está dirixida a público familiar e a nenas e nenos a partir de cinco anos.
Mañá xoves, 27 de abril, ás 19.15 h terá lugar na Biblioteca Municipal de Tui a sinatura do acordo de doazón da biblioteca de cine e doutras coleccións de Daniel Domínguez Pérez, o guionista tudense falecido no ano 2020, ao concello de Tui. O acto contará coa presenza do alcalde de Tui, Enrique Cabaleiro, e da viúva de Daniel Domínguez, María de los Ángeles García Domínguez.
Deste xeito a Biblioteca Municipal de Tui pasará a contar cunha sección especial integrada por preto de 2 mil obras especializadas en cine e con máis de 500 filmes en DVD.
