A Oficina Municipal de Atención a inmigrantes e emigrantes retornados do Concello promove a integración destes colectivos e informa sobre o procedemento de arraigamento social
A Oficina municipal de Atención a inmigrantes e emigrantes retornados leva un mes en funcionamento.
Informa sobre o proceso de arraigamento social
A Concellería de Servizos Sociais, Educación e Muller conta dende hai un mes con este novo servizo, que se puxo en marcha dentro do Plan Municipal de Inmigración e Retorno aprobado o pasado mes de marzo, co obxectivo de desenvolver os primeiros procesos de acollida, información, orientación , atención e integración destes colectivos.
Dende a oficina infórmase sobre a situación xurídica e trámites administrativos a realizar dada a condición de inmigrante e emigrante retornado. Neste senso asesórase na tramitación de autorizacións de residencia, traballo, visados, adquisición de nacionalidade, agrupamento familiar e todo tipo de trámites administrativos que este colectivo precise así como sobre as posibles prestacións sociais, educativas ou sanitarias, e os programas formativos e de orientación e inserción laboral ás que teñan dereito.
Neste mes de funcionamento as consultas máis demandadas estiveron relacionadas coas axudas a emigrantes retornados, a busca de emprego e as bolsas de emprego e formación para estes colectivos, así como sobre a tramitación de diferentes autorizacións de residencia e traballo.
En canto aos estranxeiros que máis demandaron este servizo atópanse os marroquís e os portugueses (reflexo da maior poboación estranxeira empadroada no noso concello), seguida de arxentinos e brasileiros.
A Oficina atópase no propio Concello e ten un horario de atención ao público de 10:00 a 14:00, de luns a venres, a través de cita previa no teléfono 986603625 extensión 54 ou nas dependencias de Servizos Sociais.
¿Qué é o arraigamento social?
O arraigamento social é unha das circunstancias excepcionais que a vixente normativa española de estranxeiría prevé para que as persoas estranxeiras poidan acceder a unha autorización de residencia temporal
¿Qué requisitos deben cumprir os estranxeiros para acceder a dita autorización?
Deberán acreditar a permanencia continuada en España durante un período mínimo de tres anos, sempre que carezan de antecedentes penais en España e no seu país de orixe, conten cun contrato de traballo firmado polo traballador e o empresario no momento da solicitude cuxa duración non sexa inferior a un ano e ben acrediten vínculos familiares con outros estranxeiros residentes, ben presenten un informe que acredite a súa inserción social emitido polo concello no que teña o seu domicilio habitual.
A estes efectos, os vínculos familiares entenderanse referidos exclusivamente aos cónxuxes, ascendentes e descendentes en liña directa.
¿Qué documentación deben presentar?
§ Pasaporte en vigor ou título de viaxe, recoñecido como válido en España, cunha vixencia mínima de catro meses.
§ Contrato de traballo firmado polo traballador e o empresario cunha duración mínima dun ano, cuxos efectos estarán condicionados á entrada en vigor da autorización de residencia e traballo solicitada.
§ Documentación acreditativa da permanencia continuada en España durante un período mínimo de tres anos. (Xeralmente o certificado de empadroamento, que se poderá solicitar no Concello)
§ No caso de que o interesado fora maior de idade penal, deberá aportar certificado de antecedentes penais expedido polas autoridades do país ou países nos que residira durante os cinco anos anteriores a súa entrada en España, no que non deberán constar condenas por delitos existentes no ordenamento español
§ No seu caso, informe emitido polo concello, no que deberá constar o tempo de permanencia do interesado no seu domicilio, os medios de vida cos que conte, o seu grado de coñecemento das linguas que se utilicen, a inserción nas redes sociais do seu entorno, os programas de inserción sociolaboral de institucións públicas ou privadas nos que teña participado e cantos outros extremos poidan servir para determinar o seu grado de arraigamento.
O Concello correspondente poderá recomendar que se exima ao estranxeiro da necesidade de contar con un contrato de traballo, sempre e cando acredite que conta con medios de vida suficientes.
A eficacia da autorización concedida estará condicionada á posterior afiliación e alta do traballador na Seguridade Social no prazo dun mes dende a notificación realizada ao solicitante. Cumprida a condición, a autorización comezará o seu período de vixencia.
No prazo dun mes dende a notificación da concesión de autorización de residencia temporal por circunstancias excepcionais ou, no seu caso, dende a súa entrada en vigor, o estranxeiro deberá solicitar persoalmente a tarxeta de identidade de estranxeiro.
¿Onde se tramita?
As persoas estranxeiras residentes no Municipio de Tui, poderán dirixirse á Oficina de estranxeiros da Comisaría da Policía Nacional sita na rúa Párroco Rodríguez Vázquez, número 3.