A próxima semana se incorporará novo persoal ao Centro de Afectados en Guillarei. Trátase dun arquitecto e dunha traballadora social contratados polo concello de Tui para reforzar a atención aos afectados no eido urbanístico e social.  Logo de rematado o proceso de selección finalmente será nos primeiros días da próxima semana cando este persoal comece a atender aos afectados de luns a venres de 9 a 14h. Onde continúan a traballar o xerente urbanístico da catástrofe, a traballadora social, unha auxiliar administrativa, unha asesora fiscal e un experto en seguros. 

O Concello de Tui estase a dirixir a distintas compañías aseguradoras co obxectivo de que revisen os expedientes non resoltos dos seus asegurados afectados pola explosión do pasado 23 de maio no barrio da Torre, en Paramos. Ao tempo dende o concello solicítase que busquen o xeito de resarcir a totalidade dos danos sufridos por cada un dos seus asegurados, sen perder de vista a excepcionalidade deste sinistro.

A próxima semana, do luns 13 ao venres 17, no Centro de Afectados en Guillarei non atenderán aos damnificados nin o xerente urbanístico nin o experto en seguros nin a asesora fiscal. Si continuará realizando o seu labor a traballadora social, a auxiliar administrativa de Urbanismo e o persoal do IGVS.

O servizo completo retomarase o día 20. O horario lembramos que neste mes de agosto é de luns a venres de 9 a 14h.

Dende mañá unha asesora fiscal comezará a atender aos afectados de Paramos e Guillarei informándoos da repercusións fiscais que poden ter as axudas que poidan recibir tendo en conta a situación actual onde teñen que tributar por elas. Esta asesora fiscal estará os martes e xoves de 10 a 14h no Centro de Afectados en Guillarei. É recomendable que os veciños leven a última declaración da Renda ou documentación que acredite os seus ingresos.  Esta asesora fiscal non atenderá o martes 14 e o xoves 16 de agosto.

O Concello de Tui contratará un asesor fiscal para prestar asistencia aos afectados pola explosión do 23 de maio no barrio da Torre, en Paramos.  Así o expuxo este mediodía o alcalde, Carlos Vázquez Padín, tras a reunión mantida no Centro Cultural de Guillarei á que asistiron medio centenar de afectados.

O presidente da Asociación de Afectados de Paramos e Guillarei, Salvador García, recibiu hoxe de mans da directora de ABANCA na rúa Compostela, Teba García, un cheque por valor de 26.096,78€ correspondente ao importe recadado inicialmente na conta aberta por ABANCA a instancias do Concello tras a explosión do 23 de maio no barrio da Torre.

O acto tivo lugar na notaría de Tui coa presenza do alcalde, Carlos Vázquez Padín, e do notario Jesús Mª Rodríguez Enríquez.

Hoxe cúmprense dous meses da explosión de material pirotécnico nun almacén ilegal no barrio da Torre en Paramos. Un suceso que causou dúas mortes, as de Abdelkhalek el Bouabi Hailas e Ezzoura Bouadel, 37 persoas feridas, e preto de 800 afectados.

A día de hoxe no Centro de Afectados, no Centro de Formación en Guillarei hai abertos 417 expedientes polos danos causados pola explosión, dos que máis de 300 se refiren a vivendas con moi diversa afectación e preto de 70 vehículos.

Mañá martes, 24 de xullo, ás 10h na Notaría de Tui, o Concello de Tui estará na entrega do cheque cos fondos recadados inicialmente cos fondos na conta aberta por ABANCA a instancias do Concello para os afectados pola explosión de Paramos.

Estarán presentes o alcalde, Carlos Vázquez Padín, os representantes da asociación de Afectados de Paramos e Guillarei, e de ABANCA en Tui.

Cómpre lembrar que existe unha Conta Solidaria aberta a nome da asociación de afectados en Abanca co número ES80 2080 5066 7330 4003 5840.

O alcalde, Carlos Vázquez Padín, manterá o próximo sábado, 28 de xullo, ás 10.30h no Centro Cultural de Guillarei unha nova reunión cos afectados pola explosión do pasado 23 de maio no barrio da Torre en Paramos.

O obxectivo da reunión é informar aos veciños dos pasos que se van dando para recuperar a zona afectada pola explosión, ao tempo que se busca tamén manter un diálogo fluído con eles e coñecer de primeira man as súas inquedanzas. Na reunión estará acompañado polo xerente urbanístico Rubén Vázquez, e pola traballadora social, Carmen González.

O alcalde, Carlos Vázquez Padín, valora positivamente a boa disposición amosada polo delegado do Goberno en Galicia, Javier Losada, na reunión de traballo celebrada esta mañá na Coruña. Na mesa Javier Losada confirmou que hoxe mesmo remiten o informe ao Ministerio de Interior para tramitar a declaración de zona afectada gravemente por unha emerxencia de Protección Civil.