Xardinería e Cociña Tradicional Galega son os dous cursos Actívate que se impartirán en Tui

Xoves, 17 de xullo de 2014. Dous son os cursos que se van impartir en Tui ao abeiro do Programa Actívate promovido pola Deputación de Pontevedra. Os cursos a impartir en Tui serán de "Xardinería" e "Cociña tradicional galega" dirixidos  a mozos de entre 16 a 35 anos preferentemente desempregados empadroados en Tui. De quedar prazas vacantes poderán acceder persoas en activo do concello de Tui, persoas desempregadas doutros concellos, persoas en activo doutros concellos e por último aqueles que non cumpran co requisito de idade.

Os interesados en realizar algunha destas accións formativas deben presentar, ata o venres 22 de agosto, a correspondente solicitude no rexistro xeral de entrada do Concello de Tui xunto á fotocopia do DNI e fotocopia da tarxeta de demandante de emprego de ser o caso. O modelo de solicitude pódese descargar da web http://www.concellotui.org/ ou recoller nos Servizos Sociais Comunitario no Concello de Tui.

O obxectivo principal do Programa Actívate é desenvolver actividades formativas de ocio e tempo libre que sexan de interese e que respondan ás demandas dos mozos da provincia, potenciando movementos de participación e cooperación social, mellorando a súa formación básica, e promovendo espazos de encontro e intercambio de experiencias.