Unha ducia de actividades enchen o “Setembro Xudeu” en Tui con visitas guiadas, conferencias, exposicións, música e ruta de tapas

O mes de setembro en Tui estará centrado nas actividades programadas para a posta en valor do patrimonio que atesoura esta localidade en relación coa presenza de comunidades xudías e criptoxudías ao longo dos séculos nesta histórica cidade.

A celebración, en 35 países de toda Europa, na primeira fin de semana de setembro das Xornadas Europeas da Cultura Xudía - que Tui celebra dende o ano 2006 - é a oportunidade para un amplo programa de actividades que percorren todo o mes.

Visitas guiadas tematizadas, conferencias, exposicións, xogo de escape room, concerto de música sefardí, as xornadas gastronómicas sefardís centradas neste ano nunha ruta de tapas de bacallau... son as ofertas que o Concello de Tui programa para este “Setembro xudeu” co obxectivo de poñer en valor a importancia da herdanza da cultura xudía e o seu patrimonio.

Cada ano se selecciona unha temática central que serve como punto focal para debates, actuacións e diversas actividades culturais. En 2024, o tema central das Xornadas Europeas da Cultura Xudía será “Familia”, un concepto co que a Rede de Xuderías -da que Tui forma parte dende 2019- quere mostrar como o proxecto común de recuperación do legado xudeu que comparten as súas 21 cidades é entendido como a extensión dunha gran familia que traballa unida nun proxecto profundamente enraizado e que crece e florece arredor da cultura e o patrimonio.

Ao longo de todo o mes de setembro colocarase na Praza do Concello e na Oficina de Turismo unha gran árbore que simboliza a unión e o crecemento das cidades que forman parte da Rede, propoñendo á veciñanza e visitantes formar parte das Xornadas cunha sinxela actividade dotada de premios. Para iso, os participantes deberán facerse unha foto xunto á árbore, e subila a instagram etiquetando á conta da Rede de Xuderías nesta rede social (@redjuderias). Entre todas as fotos, sortearanse exemplares das publicacións da Rede de Xuderías que rescatan o patrimonio material e inmaterial desta herdanza (“Ciudades de Sefarad”, “Sabores de Sefarad” e “Gastrosimbología”).

Para a concelleira de Turismo e Patrimonio, Ana María Núñez Álvarez, a celebración deste “Setembro xudeu” reúne un amplo abano de ofertas e actividades para todos os públicos que nos achegan ao coñecemento do legado xudeu na nosa cidade que conforma un interesante capítulo da historia tudense. Cabe lembrar, engade a concelleira, que Tui é a única cidade da provincia de Pontevedra que forma parte da Red de Juderías de España – Caminos de Sefarad e do itinerario cultural do Consello de Europa “Rutas do patrimonio xudeu” que xestiona a The European Association for the Preservation and Promotion of Jewish Culture and Heritage (AEPJ).

Ana María Núñez destaca, xunto ás visitas teatralizadas, a presentación do libro e exposición de Vilma Faingezicht - que chega dende Costa Rica -, a conferencia de Israel Doncel, director de comunicación de Casa Sefarad, o concerto do dúo “Terra sigilata” co seu espectáculo “Las madres de Sefarad”, o xogo de escape room ou a nova oferta das xornadas gastronómicas sefardís cunha ruta de tapas de bacallau en oito establecementos da nosa localidade.

PROGRAMA

• Todo o mes de setembro
  • Photocoll Xornada Europea da Cultura Xudía – Familia
  • Situado en Praza do Concello e Oficina de Turismo
  • Escape  Room, descarga mediante QR na Oficina Municipal de Turismo
  • Xornadas gastronómicas sefardís: ruta de tapas de bacallau
• Domingo, 1 de setembro
  • 11,30 h.: Visita guiada “As familias xudías de Tui”
  • Guiada polo historiador Suso Vila
  • Inicio no lavadoiro de Riomuiños
• Luns, 2 setembro
  • 20,00 h.: Presentación do libro de Vilma Faingezicht
  • “Una judía en el Camino de Santiago”
  • Exposición “Luces de esperanza dende os sambenitos de Tui” de Vilma Faingezicht
  • Exposición “As familias criptoxudías, entre a diáspora e a asimilación, os Coronel”. Comisario Suso Vila.
  • Sala Municipal de Exposicións – Edificio Francisco Sánchez
• Venres 6 de setembro
  • 19,30 h.: Conferencia ““El mundo judío comunicado a través del arte”
  • Israel Doncel, director de comunicación de Casa Sefarad
  • Sala Municipal de Exposicións – Edificio Francisco Sánchez
• Sábado, 7 setembro
  • 22,00 h.: Visita guiada nocturna con degustación de viño kosher
  • Inicio Oficina Municipal de Turismo
• Domingo, 8 setembro
  • 11,30 h.: Visita guiada con momento musical
  • Inicio Oficina Municipal de Turismo
• Domingo, 15 domingo
  • 11,30 h.: Vista teatralizada ao patrimonio xudío
  • Inicio Oficina Municipal de Turismo
• Domingo 22
  • 11,30 h. Visita guiada “Presenzas xudías na catedral de Tui”
  • José Ramón Fernández Fernández
  • Inicio: Portada da Catedral de Tui
  • 20,00 h.: Concerto do dúo “Terra sigilata” co seu espectáculo “Las madres de Sefarad”
  • Igrexa gótica de San Domingos de Tui
• Sábado 28
  • 18,00 h. Escape Room: “A comunidade xudía de Tui”
  • Inicio Oficina Municipal de Turismo
• Domingo 29
  • 18,00 h. Visita guiada ao Tui xudeu
  • Inicio na Oficina Municipal de Turismo