Tui rexistra a mellor cifra turística en marzo dos seis últimos anos
Tui rexistrou no pasado mes de marzo as mellores cifras turísticas dos últimos seis anos, segundo os datos da Oficina Municipal de Turismo. Con 1.372 visitantes atendidos, a cidade confirma a súa tendencia á alza no sector turístico, reforzando o seu atractivo como destino cultural e patrimonial de referencia no sur de Galicia.
A concelleira de Turismo, Ana Núñez, destaca o positivo balance que supón esta cifra, mellorando incluso anos anteriores nos que a Semana Santa coincidiu en marzo. “Estes datos reflicten o dinamismo do sector turístico tudense, consolidando a cidade como un destino de referencia”, sinala a edil.
A concelleira pon en valor o crecemento do turismo cultural en Tui, grazas ao seu rico patrimonio histórico e á ampla oferta de actividades. “Protexer e conservar o noso patrimonio, ademais de construír unha cidade amable con servizos de calidade, son claves para seguir desenvolvendo a economía local a través do turismo”, subliña.
A cidade prepárase agora para recibir aos visitantes durante a Semana Santa e as festas de San Telmo, cunha programación que combina tradición, cultura, gastronomía e lecer. Con estes bos resultados, Tui espera manter a tendencia positiva e seguir consolidándose como un dos destinos turísticos máis atractivos de Galicia.
En concreto, en marzo, foron 1.372 as persoas que pasaron pola Oficina de Turismo, no céntrico Paseo da Corredoira, das que 1.024 foron visitantes e 348 peregrinos e peregrinas.
Os peregrinos e peregrinas foron na meirande parte internacionais chegados de lugares coma Alemaña (63), EEUU (29), Portugal (22), Italia (17), Australia (10), Corea do Sur (9), Taiwán (9)… foron os principais puntos de orixe de peregrinos en marzo acreditando a potencialidade desta ruta xacobea. Mentres os 114 peregrinos e peregrinas nacionais procedían de Pontevedra (15), Madrid (15), Barcelona (10), Alacante (10), As Palmas (9), Tenerife (8), Sevilla (5 )...
Mentres dos 1.034 turistas que en marzo pasaron pola Oficina de Turismo, 936 foron visitantes nacionais fronte a 88 de procedencia estranxeira.
Os turistas españois chegaron dende :Madrid (235), Burgos (84), Asturias (80), A Coruña (79), Pontevedra (66), Baleares (53), Ourense (52)... namentres que os internacionais procedían de Portugal (47), Alemaña (12), Arxentina (6), Países Baixos (4), Bélxica (4), Canadá (4), EEUU (3) ...
Tui agarda continuar con estes datos positivos durante o mes de abril, tanto en número de visitantes como de peregrinos. A cidade brindará aos visitantes unha experiencia única durante a Semana Santa e as festas de San Telmo, cunha oferta cultural, de lecer e gastronómica que sen dúbida engadirán un atractivo máis á visita ao municipio.