Tras o requirimento realizado polo Concello hoxe comezou a demolición parcial dun edificio declarado en ruína na rúa Colón

Esta mañá comezaron os traballos de demolición parcial do edificio situado no número 7 da rúa Colón para garantir a seguridade na súa contorna. O Concello que Tui, a través da concellería de Urbanismo, tras a declaración de ruína do inmoble, ante a situación de deterioro que presenta, no mes de xullo requiriu aos propietarios, neste caso á Xunta de Galicia, para garantir a seguridade no mesmo e evitar posibles danos ou o colapso da edificación co paso do tempo.

Hoxe mesmo a Xunta comezou a executar estes traballos de desentullo, seguridade e estabilidade do inmoble  tras o requirimento realizado polo Concello de Tui para manter o inmoble en condicións de seguridade, salubridade, ornato público e decoro. Así débense executar obras de demolición parcial da edificación ata alcanzar a estabilidade e seguridade da edificación. Entre as actuacións requiridas está a retirada das tellas e dos elementos en perigo de desprendemento da cuberta, así coma a limpeza de entullos  do interior e exterior do inmoble.

O Concello de Tui busca así manter as condicións de seguridade para os viandantes nesta rúa, que conta con gran tránsito de persoas.