Títeres Trompicallo presenta o venres no Teatro Municipal, "Violeta coletcas contra as salchicas ¡glup!"
Títeres Trompicallo presenta "Violeta Coletas contra as salchichas ¡glup!"
É unha obra para público familiar. Comezará o venres ás 20h
Martes, 20 de outubro de 2009. O público familiar é o destinatario da obra de monicreques programada para este venres, 23 de outubro, no Teatro Municipal de Tui. Chegará da man da compañía Títeres Trompicallo que porá en escena a obra "Violeta Coletas contra as salchichas ¡glup!".
Violeta, a protagonista, é unha nena que quere crecer porque non lle gusta que lle digan o que ten que facer, quere escoller que ninguén lle dea ordes. Ela prefire comer salchichas a acelgas, e dende logo non cambia a tele por ter que ir estudar. Pero de repente algo acontece e todo cambiará.
Esta obra foi escrita por Luís González e Marián González, asumindo tamén esta última a dirección do espectáculo. Mentres Luís González e Sabela Amado son os titiriteiros que dan vida aos distintos personaxes da historia, e Ignacio Sanz é o responsable da música orixinal. Nesta ocasión a compañía conta coa colaboración do artista plástico Quique Bordell. A obra foi estreada o pasado mes de xuño, está indicada para público familiar e nenos maiores de 6 anos e ten unha duración de 50 minutos.
A cita é este venres, ás 20h, no Teatro Municipal de Tui. As entradas están xa á venda en www.culturatui.info ou o venres dende ás 18.30h no despacho de billetes da Área Panorámica. As localidades teñen un prezo xeral de 3€, 2€ con desconto e tamén para os menores de 12 anos.
Títeres Trompicallo creouse en 1997 da man de Marián González, Eva Sanz e Luís González. Dende entón teñen producido varios espectáculos coma "Manoladas", "Drácula", "Jiñol", "Manolito Camaleón" e "Nadarín". Trompicallo é unha das compañías máis exitosas dentro do panorama do teatro galego de monicreques.
Títeres Trompicallo con "Violeta Coletas contra as salchichas ¡glup!"
Lugar: Teatro Municipal
Data e hora: Venres, 23 de outubro ás 20h
Entradas: 3€ adultos - 2€ con descontos e menores de 12 anos
Venda de entradas na web www.culturatui.info ou o venres dende ás 18.30 no despacho de billetes