Presentado o servizo de Taxi 24 horas

O Alcalde de Tui, Moisés Rodríguez Pérez, acompañado polo concelleiro de tráfico e seguridade, Ángel Gutiérrez González, e representantes do colectivo de taxistas de Tui presentaron esta mañá o novo servizo de taxi ás 24 horas na nosa cidade.

Segundo informou o concelleiro de tráfico e seguridade dende o vindeiro luns xa estará operativo este servizo. No decurso do acto o Alcalde tudense entregou ao colectivo de taxistas o teléfono móbil que fornece o Concello para desviar a chamada do usuario do servizo de taxi dende a centraliña ata o taxista que estea de garda. Este desvío non supón un incremento de custe para o demandante do servizo.

Con esta nova medida o colectivo de taxistas do municipio tudense continúa traballando na procura dun mellor servizo e completa medidas adoptadas anteriormente, como foi a colocación de taxímetros en todos os taxis, un aparello que ata agora só estaba instalado nos taxis das grandes cidades. Trátase de garantir aos usuarios un servizo máis profesionalizado e de maior calidade.

Para o concelleiro de tráfico e seguridade, Ángel Gutiérrez González, este acordo entre o colectivo de taxistas e o Concello de Tui para dotar ao noso municipio dun servizo permanente de taxi se enmarca dentro dos obxectivos do goberno municipal tudense de incrementar o nivel e a calidade dos servizos para mellorar a calidade de vida dos veciños e veciñas de Tui.