O Consorcio de Augas do Louro alerta de chamadas e visitas dunha empresa allea ao servizo que cuestiona a calidade da auga co obxectivo de vender aparellos para o tratamento da auga da billa
A empresa en cuestión intenta convencer aos veciños, mediante probas químicas enganosas, da necesidade de instalar equipos de tratamento da auga nas vivendas.
O Consorcio do Louro informa do exhaustivo control de calidade que realiza sobre a auga, con máis de 23.000 determinacións analíticas ao ano, que garanten a calidade da auga que subministra nos municipios do Porriño, Tui, Mos e Salceda de Caselas.
O Consorcio de Augas do Louro e Aqualia informan que tiveron coñecemento, nos últimos días, de chamadas telefónicas e visitas a domicilios por parte de persoas alleas ao servizo de abastecemento durante as cales, alegando presuntos problemas de calidade da auga da billa, instan á veciñanza a mercar e instalar nas súas casas uns mecanismos para o tratamento da auga.
Estas persoas están a xerar unha alarma inxustificada sobre a calidade da auga subministrada, chegando a realizar nas vivendas unha proba química enganosa durante a cal a auga da billa escurece, mentres que a que eles mostran como tratada polo mecanismo que comercializan non sofre este cambio de coloración.
O Consorcio de Augas do Louro quere deixar claro que a calidade da auga subministrada polas redes municipais está garantida por un exhaustivo sistema de control sanitario que a certifica como TOTALMENTE APTA PARA O CONSUMO HUMANO. Ademais, informa que o Consorcio e Aqualia, como proba do seu compromiso coa calidade do servizo prestado, analizan a auga da rede de distribución en puntos especialmente habilitados para iso, sen necesidade de acceder ao interior das vivendas.
O Consorcio de Augas do Louro quere transmitir a súa plena confianza no exhaustivo control que realiza sobre a auga distribuída nos municipios que xestiona, realizando máis de 23.000 determinacións analíticas ao ano en laboratorios acreditados baixo a norma ISO-17025, cumprindo estritamente co establecido no RD 3/2023, do 10 de xaneiro, polo que se establecen os criterios técnico-sanitarios da calidade da auga de consumo, o seu control e subministración.
Ademais, e como reforzo adicional á calidade da auga que distribúe, quere informar á veciñanza que as Autoridades Sanitarias da Xunta de Galicia realizan os seus propios controis de vixilancia nas instalacións municipais, levando a cabo as correspondentes análises de contraste. Deste xeito, a suma dos dous tipos de control garante a calidade da auga subministrada.
Todos os datos relativos á calidade da auga distribuída e os resultados das mostras analíticas efectuadas poden consultarse a través do Sistema de Información Nacional de Consumo –SINAC– do Ministerio de Sanidade.
O Consorcio de Augas do Louro e Aqualia reiteran o seu compromiso coa veciñanza e traballan día a día para ofrecer auga de gran calidade, poñendo ao dispor do servizo os medios humanos e técnicos máis avanzados que garantan un exhaustivo control da auga subministrada.
Para máis información
www.consorciodolouro.es
900 810 103
contacto@consorcio.es
www.aqualia.com
https://www.aqualia.com/es/area-de-cliente/prevencion-fraudes