O concello de Tui solicita a declaración de catro “lugares de memoria democrática”

O alcalde de Tui, Enrique Cabaleiro, asinará mañá martes, ao abeiro do establecido na Lei 20/2022, do 19 de outubro, de Memoria Democrática, a solicitude de declaración de catro enclaves da nosa cidade como “Lugares de memoria democrática” co obxectivo, en palabras do propio rexedor Enrique Cabaleiro, de preservar a memoria das vítimas da Guerra Civil e posterior represión pola ditadura franquista, tamén como testemuño de recoñecemento e co obxectivo de erradicar calquera forma de violencia política ou totalitarismo.

Nesta solicitude que se envía á Dirección General de Atención a las Víctimas y Promoción de la Memoria Democrática do Ministerio de Política Territorial y Memoria Democrática se propón esta declaración para estes catro enclaves directamente relacionados coas vítimas da guerra e posterior represións:

• O antigo cárcere do partido xudicial na Praza da Inmaculada onde estiveron detidos a inmensa maioría destes represaliados
• O parque da Alameda pois no inmediato cuartel de San Domingos tiveron lugar numerosas execucións dos condenados á pena capital
• O Destacamento da Armada como recoñecemento a lealdade da dotación do “Cabo Fradera” ao goberno lexítimo
• O cuartel dos Carabineros, actualmente da Guardia Civil, pois tamén este corpo policial mantivo unha exemplar fidelidade fronte ao golpe militar.

Con estes catro lugares preténdese a creación, tamén, dun itinerario de memoria democrática no noso concello que sufriu unha elevada represión logo de ser o último reduto de resistencia ao golpe militar do 18 de xullo, pois Tui e o Baixo Miño non caeron baixo o control dos sublevados ata o 26 de xullo de 1936 logo de vencer este o intento de resistencia de militares e milicianos tudenses na Volta da Moura (lugar que non pode ser incluído nesta solicitude do Concello tudense ao atoparse no municipio veciño de Salceda de Caselas).

A sinatura polo alcalde tudense desta petición terá lugar mañá, 27 de agosto, no 88 aniversario das execucións realizadas na nosa cidade nas que foron fusilados diversos dirixentes sociais e políticos de Tui e a súa contorna: os tudenses Enrique Jaso, o seu xenro José Alonso, Francisco Guinde e José Barreiro, xunto ao porriñés José Francés Carpintero, e o monfortino Manuel López Losada.

Para Enrique Cabaleiro esta solicitude que comeza agora a súa tramitación ten a vontade de conservar presente na memoria colectiva a memoria dos homes e mulleres vítimas da represión e violencia desatada tras o rebelión militar, a guerra civil e a ditadura elemento básico para afondar na potenciación dos valores democráticos que rexen a nosa vida colectiva.