Martiño Noriega ofrece mañá xoves unha conferencia no ciclo “Sobredo, 103 anos despois”
O papel dos médicos en Sobredo e hoxe centra esta nova cita do “Mes da memoria”
Mañá xoves, 20 de novembro, ás 19,30 horas celebrarase unha nova conferencia do ciclo “Sobredo, 103 anos despois”. O médico Martiño Noriega presentará o seu libro “Os médicos tamén enferman”. Estará acompañado polo editor do libro Henrique Alvarellos e pola presidenta do Instituto de Estudios Agrarios Mártires de Sobredo, IEAMSo, Marga do Val. Celebrarase no Espazo socio-cultural da rúa Camilo José Cela.
Marga do Val, presidenta do IEAMSo, sinala que esta nova conferencia do ciclo sobre Sobredo pretende incidir no papel da medicina e dos médicos tanto naqueles sucesos de 1922 , no que tivo especial protagonismo o doutor tudense Alejo Diz Jurado que atendeu a varios dos feridos polos disparos da Guardia Civil, como na actualidade con esta obra que recolle a experiencia de médico de familia Martiño Noriega.
Doce anos despois de exercer como alcalde, primeiro no Concello de Teo, e despois en Santiago de Compostela, Martiño Noriega regresou á súa profesión, a Medicina. Os médicos tamén enferman é unha crónica persoal onde Noriega relata o seu retorno ao mundo sanitario nestes anos precarios. Escrito entre os anos 2021 e 2024, relata o sentir dun médico no duro contexto da sanidade pública nesta época da post-Covid, mais tamén está inspirado nas voces directas das propias persoas que escoita cada día na súa consulta de atención primaria.
A concelleira de Cultura tudense, Sonsoles Vicente Solla, indica que esta nova actividade do ciclo “Sobredo, 103 anos despois”, continúa avanzando as actividades do “Mes da memoria” que promove o Concello de Tui, en colaboración con diversos colectivos tudenses, para afondar no coñecemento e recuperación da memoria democrática e que expresa o compromiso da sociedade tudense e do propio Concello de Tui coa investigación, a lembranza e a dignificación xa dos procesos de afirmación democrática do século XX, nos que tiveron un especialísimo protagonismo os sucesos de Sobredo. O 28 de novembro de 1922, Cándida Rodríguez González, embarazada e veciña de Pazos de Reis, Joaquín Besada, de Soutelo, e Venancio González Romero, de Budiño, foron asasinados a tiros por defender un veciño contra o pago dos foros, sendo coñecidos como os Mártires de Sobredo.