Mañá venres obradoiro de banda deseñada na Biblioteca con Jacobo Fernández Serrano, premio Merlín 2009
UN OBRADOIRO DE BANDA DESEÑADA CON JACOBO FERNANDEZ SERRANO NOVA ACTIVIDADE MAÑÁ VENRES DA BIBLIOTECA MUNICIPAL
Xoves, 22 de outubro de 2009. A Biblioteca Pública Municipal de Tui continúa levando adiante o seu programa de actividades arredor da celebración do "Dia da Biblioteca" e logo das xornadas do mércores e xoves, cun contacontos para adultos e cine de animación para os rapaces, mañá venres, 23 de outubro , desenvolvérase un obradoiro de banda deseñada a cargo do ilustrador Jacobo Fernández Serrano, un dos principais representantes da nova ilustración galega.
Este obradoiro dará comezo ás 17,30 horas e durará ata ás 19,00 horas e está dirixido especialmente a rapaces e mozos a partir dos 10 anos de idade.
Jacobo Fernández Serrano é o recente gañador do Premio Merlín de Literatura Infantil 2009, ben coñecido polo seu traballo como ilustrador e autor de cómic (gañou o Premio Castelao de Banda Deseñada en 2007 con Aventuras de Cacauequi e este ano estivo nomeado ao mellor autor revelación no Saló del Còmic de Barcelona), mais xa publicara dous libros infantís escritos e ilustrados por el: A Gardería de Dona Bixelmina (Edicións Xerais, 2005) e A pedra e as formigas (Edicións Xerais, 2006). Ten publicados ademais os álbums de BD Os amigos de Archimboldo Roque (Faktoría K, 2007) e El origen de Marcopola (Bang Ediciones, 2009).
Esta actividade da Biblioteca Municipal de Tui forma parte do programa Letras Vivas que promove a Dirección Xeral de Promoción e Difusión da Cultura da Consellería de Cultura e Turismo.