Hoxe inaugúrase na Área Panorámica unha exposición fotográfica de Miguel Núñez

Ás oito desta tarde inaugúrase na Sala Anexa de Exposicións da Área Panorámica unha nova mostra, nesta ocasión da man do fotógrafo Miguel Núñez baixo o título “Illas, náufragos invisibles”. O acto contará coa presenza da concelleira de Cultura de Tui, María José González, e do propio fotógrafo.

A exposición, que estará aberta ó público ata o 10 de xaneiro, poderase visitar en horario de 10h a 14h e de 17h a 20.30h.

Nesta mostra fotográfica Miguel Núñez expresa a sensación de naufragar, xa que somos illas, e en ocasións naufragamos condenados á deriva. Entón é cando aparece algo ou alguén, senón desaparecemos co noso pasado, sen futuro. Segundo o fotógrafo a eles vai dedicado este grito, ós “invisibles”, ós que non lograron salvarse aínda, ós que deambulan ó outro lado da fronteira, de onde non se volta, da sutil liña divisora que te leva a unha vida sen futuro e ausente de horizontes, sen unha táboa á cal aferrarse que te empurra ó naufraxio, á nada que é ser un invisible.