A galega Hydn mesturará danza e música en directo no Festival Boas Vibes

Sandra Guedev, coñecida artisticamente como Hydn, é unha das artistas que actuará no Festival Boas Vibes que se celebrará o sábado 6 de setembro na Alameda de San Domingos. Actuará ás 21 h cunha proposta que mestura danza, música en directo e dj.
Hydn é creadora do que se podería definir como “galenglish”, ao mesturar o noso idioma co inglés nas súas cancións. Foi galardoada co Premio Martín Códax 2024 a Mellor Artista Urbana e estivo entre as favoritas para representar a España no Festival de Eurovisión no ano 2022, sendo unha das máis votadas na sondaxe popular de Eurovisión Spain, antesala do Benidorm Fest. 

Anteriormente foi fundadora e integrante do grupo Inland Valley, un dúo coruñés fundado no ano 2018, e no que exploraba diferentes estilos, como o Dream Pop, o Indie e Alternativo. 

Na súa carreira en solitario, Hydn mestura o pop, urbano, electrónico e Y2K. Dende a súa irrupción musical presentou sinxelos como “Augurio” ou “Peter pan” até o lanzamento do seu EP debut “BaddeR wicKed”. 

Hydn actuará o sábado 6 de setembro ás 20 h na Alameda de San Domingos, en Tui, dentro da programación do Festival Boas Vibes. 

Previamente ás 18.30 h estará en concerto Supernova, o grupo emerxente vigués, que interpretará diversos temas de rock alternativo, indie, punk… Esta banda de cinco integrantes naceu no mes de outubro de 2024, e despois de actuar en diversas salas e eventos chega a Tui dentro do Festival Boas Vibes cun concerto no que transportarán ao público á música dos anos 80, 90 e  2000.

Neste Festival Boas Vibes contarase tamén coa participación de tres dj’s: Sofi Peries, Samu Pexe e Sarinha. 

Dj Sofi Peries, coruñesa, porá música na hora vermú do festival, dende as 13.30 h. Nas súas sesións fusiona electro, breaks, guetto tech e ritmos hipnóticos, sen limitarse a un único estilo. 

O porriñés Samu Pexe actuará ás 16.30 h cunha sesión na que pinchará cancións cun ritmo latino, electrónica e pop. 

Porá fin a esta sesión a viguesa Dj Sarinha, artista cun gran compromiso coa cultura underground, que mestura nas súas sesións percusión, sons escuros e hipnóticos, e con ritmos contundentes. 

A programación completa pode consultarse en tui.gal.