Éxito de participación nos cursos de informática promovidos polo Concello de Tui

Éxito de participación nos cursos de informática promovidos polo Concello de Tui
Comezaron hoxe con 80 participantes

Mércores, 10 de novembro de 2010. Hoxe comezou o primeiro dos cursos de informática que o Concello de Tui organizou neste mes de novembro no Telecentro tudense. Aos poucos días de anunciar a convocatoria destas accións formativas a totalidade das prazas ofertadas foi cuberta. En total son 80 persoas as inscritas nos dous cursos convocados, e outras vinte máis en lista de espera.

O Concelleiro de Cultura, Moisés Rodríguez Pérez, saudou esta mañá aos 40 participantes no primeiro dos cursos, “Introdución a internet e correo electrónico”, amosando a satisfacción do Concello pola importante resposta acadada nesta convocatoria que certifica o acerto da súa realización para ofrecer aos cidadáns ferramentas de acceso ás novas tecnoloxías da información e a comunicación.

Para o Concelleiro de Cultura tudense con esta oferta de cursos o Concello de Tui tenta dinamizar a actividade do Telecentro e responder a unha ampla demanda de actividades formativas para os diversos segmentos sociais, neste caso cunha actividade dirixida especificamente a un sector precisado de accións de achegamento ás novas tecnoloxías: xubilados e amas de casa.

Este Telecentro de Tui é un equipamento promovido polo Concello de Tui e a Secretaria Xeral de Medios da Xunta de Galicia e que desenvolve una actividade formativa en diversos ámbitos e materias. En definitiva, trátase dun espazo á disposición da sociedade tudense para a súa formación e acceso ás novas tecnoloxías da comunicación e da información.

Mañá iniciase o segundo dos curso convocados sobre “Iniciación no procesador de textos”.