A EDAR de Guillarei adiántase aos obxectivos europeos e acada un récord de autoconsumo enerxético en 2025

A Estación Depuradora de Augas Residuais (EDAR) de Guillarei, pertencente ao Consorcio Augas do Louro e xestionada por Aqualia, acadou un fito importante en sustentabilidade enerxética: durante o primeiro semestre de 2025, a planta logrou cubrir o 50% do seu consumo enerxético mediante fontes renovables propias, marcando un récord de autoconsumo.

Este resultado foi posible grazas a dúas fontes principais de xeración enerxética:
• Por unha banda, a planta produciu 244.502 kWh de enerxía solar fotovoltaica a través dos paneis instalados nas súas instalacións.
• Por outra, xerou 868.575 kWh a partir do biogás obtido no proceso de dixestión anaerobia dos lodos de depuración.

Grazas a esta produción renovable, a EDAR evitou a emisión de aproximadamente 257.121 quilogramos de CO₂ á atmosfera, contribuíndo de xeito significativo á loita contra o cambio climático.

Este avance posiciona a Guillarei como referente na transición enerxética do sector da auga, adiantándose aos obxectivos establecidos pola Directiva Europea 2024/3019, que esixe que as EDAR cubran polo menos o 30% do seu consumo con renovables para o ano 2030. Guillarei non só superou ese limiar cinco anos antes, senón que xa se achega ao seguinte obxectivo intermedio do 60% previsto para 2040.

“Este récord demostra que a neutralidade enerxética no tratamento de augas residuais non é unha meta afastada, senón unha realidade acadable con compromiso e tecnoloxía”, sinalan os responsables da planta.

A EDAR de Guillarei continúa traballando para mellorar a súa eficiencia, avanzar cara á neutralidade enerxética total antes de 2045, e consolidar un modelo de economía circular na xestión da auga.