Deportistas tudenses acadan grandes resultados en competicións internacionais e nacionais
Jesús González e Sergio Pérez, cuartos no Campionato de Europa de Remo, Gustavo Rodríguez, décimo no Campionato do Mundo de Duatlón, Uxía Pérez, quinta no campionato clasificatorio para os Xogos Olímpicos da Xuventude e Aida Valiño, primeira no Campionato de España Universitario de triatlón
Mércores, 4 de xuño de 2014. A pasada fin de semana varios deportistas tudenses participaron en competicións internacionais e nacionais, acadando uns magníficos resultados nas modalidades deportivas de remo, duatlón, atletismo e triatlón.
Na localidade Serbia de Belgrado, disputouse o Campionato de Europa de Remo, onde os remeiros tudenses Jesús González e Sergio Pérez, participaron, xunto ás mellores seleccións mundiais, na modalidade catro sen temoeiro peso lixeiro, acadando o cuarto lugar na final, mellorando o seu resultado do ano pasado nesta mesma competición, onde acadaron no sexto posto. O equipo formado por Patricio Rojas, Marc Franquet e os remeiros do Club Remo Tui, Jesús González e Sergio Pérez, superaron a embarcacións que foron superiores a eles nos pasados Campionatos do Mundo de Corea do Sur, indicando o gran estado de forma de cara ao próximo Campionato do Mundo de Amsterdam, a finais do mes de agosto.
Por outra parte, Gustavo Rodríguez participou no Campionato do Mundo de Duatlón, celebrado o pasado sábado en Pontevedra, onde rematou en décima posición. O deportista tudense, que competiu a fin de semana anterior no triatlón de Bilbao, acadando o primeiro posto, demostrou ante o seu público o gran estado de forma que ten, facendo unha espectacular remontada no sector de bicicleta e mantendo na liña de chegada o décimo posto.
A atleta tudense do Club Atletismo Tui-Thermalia, Uxía Pérez, que participou en Baku (Azerbaian), nos trials clasificatorios para os Xogos Olímpicos da Xuventude, na proba dos 3.000 metros, finalizou nun meritorio quinto posto, facendo a súa mellor marca persoal, cun tempo de 9.57.39. Aínda que Uxía non acadou a clasificación para estes Xogos Olímpicos da Xuventude, demostrou ter un excelente estado de forma de cara aos próximos Campionatos de España.
Por último, a atleta lucense Aida Valiño, afincada dende hai un tempo na nosa cidade, acadou a medalla de ouro nos Campionatos de España Universitarios na modalidade de triatlón, celebrados na localidade murciana de Los Alcázares. A triatleta lucense, que cursa o Grao en Enfermaría no campus de Pontevedra, participou coa Universidade de Vigo nos campionatos de España organizados pola UCAM.
O Concello de Tui felicita a Jesús González, Sergio Pérez, Gustavo Rodríguez, Uxía Pérez e Aida Valiño, polos excelentes resultados acadados a nivel internacional, así como aos adestradores e directivos dos seus clubs, Club Remo Tui e Club Atletismo Tui-Thermalia.