Comezan os actos conmemorativos do oitavo centenario da Catedral de Tui
A catedral de Tui é unha das grandes iconas do patrimonio cultural tudense e de Galicia. Este domingo, 30 de novembro, comezan os actos conmemorativos do 800 aniversario da súa consagración. Durante os próximos 12 meses a cidade será capital cultural cun amplo e diverso programa de eventos que darán a coñecer esta peza clave do seu patrimonio, así como o que a Catedral representa para o municipio.
O alcalde de Tui, Enrique Cabaleiro, encabezará o nutrido grupo de autoridades civís, militares e eclesiásticas que asistirán este domingo aos actos previstos no templo catedralicio.
Confirmaron presenza o presidente do Parlamento de Galicia, Miguel Santalices, o presidente da Deputación, Luís López, o conselleiro de Cultura, Lingua e Xuventude, José Campos, o director de Turismo de Galicia, Xosé Manuel Merelles, e o subdelegado do goberno, Abel Losada. Acudirán o presidente da Cámara de Valença, José Carpinteira, o alcalde de Frómista, Feliciano Montes, xuntos a membros da corporación municipal de Tui, entre moitos outros.
Ás 12h está prevista a apertura do Ano Xubilar e a celebración dunha eucarística presidida polo arcebispo de Santiago de Compostela, monseñor Francisco José Prieto, e concelebrada polo bispo de Tui-Vigo, monseñor Antonio Valín, polo bispo emérito tudense, Luis Quinteiro, e o arcebispo de Baga, monseñor José Manuel García.
Ao remate terá lugar a interpretación, con estrea en España, de “Os fogos de San Telmo” de Hermelindo Ruíz Mestre que ofrece un diálogo entre o fresco histórico de San Telmo en Porto Rico e a catedral tudense.
Xa pola tarde, ás 17.30 h, celebrarse na Catedral o “Concerto Centenario” no que os tudenses Sara Areal, violín, e Samuel Diz, guitarra, lideran unha formación integrada por Diana Poghosyan, violín; Luigi Mazzucato, viola; Raúl Mirás, violonchelo; David Collazo, percusión; Elsa Roldán, soprano; i Hermelindo Ruiz Mestre, guitarra. No concerto terá lugar a estrea absoluta de “Catedral Atlántica” composta polo galego Fernando Buide del Real. Amais interpretarán obras de Correlli, Mozart e "Os fogos de San Telmo" de Hermelindo Ruíz Mestre. Esta última preza será dirixida por Roselyn Pabón, dirección. A entrada é libre até completar o aforo.
O alcalde de Tui, Enrique Cabaleiro, destaca que “a catedral é unha das grandes iconas tanto dende o punto de vista da súa dimensión espiritual como patrimonial de Tui, de Galicia e deste país”. Engade que esta efeméride porá en valor e dará a coñecer “o conxunto catedralicio, o patrimonio de Tui e todo o que Tui ten que ofrecer”. Convida a participar de amplo programa de actividades que dende este domingo se van realizar no marco desta conmemoración.