Ata o sábado 29 celébrase o V Ciclo de concertos "Musica en el claustro" na Catedral tudense
Celebrarase do 25 ao 29 de agosto
O V Ciclo de Concerto no claustro gótico da Catedral reúne música, pintura, escultura e arquitectura
Os concertos serán ás 21h. Haberá dúas masterclass, unha exposición e unha visita guiada
Luns, 17 de agosto de 2009. Do 25 ao 29 de agosto vaise celebrar o V Ciclo de Concertos no Claustro Gótico da S.I. Catedral de Tui. Trátase dun evento consolidado que aposta pola arte a través de varias manifestacións coma a música, a pintura, a escultura, e a arquitectura. Ao mesmo tempo é tamén escaparate para os músicos tudenses que comparten cartel con afamados intérpretes internacionais. Dúas son as principais novidades deste ano. Por unha parte a celebración de dúas Master Class unha de guitarra e outra de órgano, e por outra unha visita guiada ao conxunto catedralicio.
O Ciclo foi presentado esta mañá na sancristía da Catedral por Don Ricardo García, Director do evento, e Samuel Diz, Director Técnico, xunto ao Concelleiro de Cultura de Tui, Moisés Rodríguez.
Samuel Diz foi o responsable de explicar os pormenores deste ciclo de concertos indicando coma a súa filosofía é que os músicos tudense sexan o centro da programación , algo que acontece dende a primeira edición. Ao tempo, indicaba, que se fai unha aposta pola unión das artes dende a música, a pintura e a escultura coa exposición programada de Carmen Pernas titulada "Armonías", e a arquitectura coa visita guiada que se vai realizar ao triforio, á cuberta de pedra e á Torre de San Andrés o xoves día 27.
Pola súa parte Don Ricardo García destacou a "maxestuosidade e sonoridade" do Claustro da Catedral onde se vai celebrar o evento, amosando a Samuel Diz o seu agradecemento por ser a "alma mater, organizador e impulsor" deste certame.
Moisés Rodríguez quixo na súa intervención felicitar a Samuel Diz polo seu impresionante traballo neste festival xa consolidado, dicía. Tamén amosou o seu recoñecemento a Don Ricardo García que "sempre fixo unha aposta polos xoves". Ao tempo que lembraba que tamén este ano o seu departamento está dando cabida na programación de verán aos mozos e mozas tudenses con proxeccións coma o documental "Mulleres da raia" de Diana Gonçalves, a curtametraxe "Sueño Cumprido" de David Fernández e Gonzalo Font, o Festival de Bandas de Música, ou o Festival Tuytú, ou agora este ciclo de música.
Os concertos
Xa no que se refire aos concertos a inauguración, o martes 25, correrá a cargo do Quinteto Roseaux integrado por Guillermo Thomson, Isabel Lastres, Luz Torres, Oscar Souto e Vanesa González. Do mesmo explicaba que Vanesa González é tudense profesora no Conservatorio da cidade, mentres que Oscar Souto, a quen cualificaba coma un dos mellores trompistas galegos, está ligado á cidade onde realizou os seus estudos de grao medio. O Concerto que ofrecerán denomínase "Campos de España" agrupando obras de Manuel de Falla, Albéniz, Enrique Granados, Gerónimo Giménez, Boccherini, e Sorozábal, entre outros.
O mércores 26 será a quenda da guitarrista eslovena Sanja Plohl, cun longo e prestixioso currículo ofrecerá "Paisaxes Latinoamericanos" interpretando obras de compositores mexicanos, paraguaios, arxentinos e venezolanos. Coma preludio actuará o xove intérprete de frauta traveseira Néstor Sutil.
Este Ciclo de Concerto ofreceranos tamén a oportunidade de escoitar o órgano catedralicio cun dos mellores interpretes españois coma Andrés Cea. Actuará o xoves 27 ás 21h, neste caso no interior da Catedral, xa que empregará o órgano barroco do templo para ofrecer obras de Joan Cabanilles, Goerg Muffat e Johann Sebastian Bach.
Este ano apóstase de novo por reservar un día do programa para a coral gañadora do Concurso de Corais de Nadal organizado pola Catedral, polo que o venres 28 ás 21h será a quenda da Coral Polifónica de Entienza que ofrecerá unha selección de obras corais de carácter profano e relixioso.
Por último o concerto de clausura correra a cargo do trío formado por Alejando Szabo, Gabriel Silvera e Diogo Barreira que ofrecerán "Noche de Tango".
V Ciclo de Concerto no Claustro Gótico da S.I. Catedral de Tui
- Concertos ás 21h
o Martes 25
§ Quinteto Roseaux - "Campos de España"
o Mércores 26
§ Néstor Sutil - "
§ Sanja Plohl - "Paisaxes latinoamericanos"
o Xoves 27
§ Andres Cea - "Retablo Sonoro"
o Venres 28
§ Coral Polifónica de Entienza
o Sábado 29
§ Diniz Szabo Silvera Tago - "Noche de tango"
o Entrada gratuíta até completar o aforamento
- Exposición de pintura e escultura de Carmen Pernas "Armonías"
o Inauguración martes 25 ás 20.30h
o Horario do mércores 26 ao sábado 29 dende ás 20.30h
- Masterclass
o "Técnica e interpretación e repertorio guitarrístico" a cargo de Sanja Plohl
§ Sala Capitular do Claustro
§ Do xoves 27 ao sábado 29
§ Matrícula 60€
§ Prazas: 10
o "O órgano entre os séculos XVI e XVIII" por Andrés Cea
§ Órgano da S.I. Catedral
§ Venres 28
§ Matrícula 60€
§ Prazas: 4
- Visita Guiada ao Conxunto Catedralicio
o Xoves 27 ás 19.30h
o Guiada por Suso Vila
o Entrada libre até completar o aforamento