Tui conmemora o Día Mundial da SIDA cunha campaña informativa
O lema deste ano é “Quererte é protexerte”
O Concello de Tui, a través do Servizo de Prevención das Drogodependencias, leva a cabo unha campaña informativa con motivo do Día Mundial da loita contra a SIDA que se conmemora este luns, 1 de decembro.
Entre as actividades que se realizan figuran os obradoiros que se levan a cabo co alumnado dos institutos de Tui para promocionar estilos de vida e formas de diversión saudables, desmitificando falsas crenzas e mala información, permitindo aos individuos estar a cargo da súa saúde e non ser pasivos, fomentando no marco asociativo xuvenil o desenvolvemento de estilos de vida saudables e ofrecendo formación sobre esta enfermidade.
Por outra parte Servizo de Prevención das Drogodependencias prepara para esta fin de semana —en colaboración cos locais de ocio nocturno de Tui— o reparto de preservativos, carteis, dípticos, e folletos informativos sobre esta enfermidade.
Amais colocouse unha pancarta na fachada do edificio Francisco Sánchez, ofrecendo información á cidadanía sobre a SIDA.
Con motivo do aumento doutras ITS – Infeccións de Transmisión Sexual – Galicia conmemora este día co lema “Quererte é protexerte”, incidindo na prevención tamén noutras ITS e continuando a loita contra o estigma e a discriminación das persoas afectadas tanto polo VIH como polas outras enfermidades de transmisión sexual.