A Eurocidade Tui-Valença impulsa unha peregrinación polo Camiño Portugués da Costa desde Caminha a Santiago de Compostela

Gran acollida á peregrinación especial impulsada pola Eurocidade Tui-Valença no marco das Xornadas Europeas do Camiño de Santiago, e que nos meses de maio e xuño percorrerá o trazado oficial portugués do Camiño Portugués da Costa, dende a cidade de Caminha ata Santiago de Compostela.

A poucos días de que comece esta actividade apenas quedas unhas prazas vacantes para as etapas do 24 e 25 de maio, e do 7 e 8 de xuño, e unha para realizar as oito de que consta  o Camiño Completo.

As etapas discorren por paisaxes espectaculares das ribeiras do Miño e lugares de grande valor patrimonial e espiritual:

• 1 de maio: Caminha – Vila Nova de Cerveira (19 km)
• 2 de maio: Vila Nova de Cerveira – Tui (23 km)
• 3 de maio: Tui – O Porriño (23 km)
• 4 de maio: O Porriño – Redondela (22 km)
• 24 de maio: Redondela – Pontevedra (24 km)
• 25 de maio: Pontevedra – Caldas de Reis (23 km)
• 7 de xuño: Caldas de Reis – Padrón (24 km)
• 8 de xuño: Padrón – Santiago de Compostela (25 km)

As persoas interesadas poden inscribirse a través do enlace dispoñible en tui.gal/gl/axenda/camino-de-santiago-eurocidade-tui-valenca, no correo electrónico caminhadas.andainas@gmail.com ou no teléfono +351 934 440 770. O prezo é de 12€ por etapa ou 80€ para quen desexe participar en todas as etapas. Inclúe guía acompañante, transporte de mochilas, seguro de asistencia e desprazamentos aos puntos de inicio e fin das etapas.

Máis alá dun reto físico, este camiño é unha oportunidade para redescubrir a beleza da contorna, conectar coa historia viva do territorio e formar parte dun legado milenario que une culturas, pobos e camiñantes de todo o mundo.

A concelleira de Turismo de Tui, Ana María Núñez,  sinala que esta iniciativa pretende “poñer en valor o trazado histórico do Camiño Portugués da Costa dende Caminha, por Vilanova de Cerveira ata Valença e Tui, tal e como fixeron milleiros de peregrinos ao longo dos séculos.”  Por outra parte Núñez lamenta que esta ruta oficial portuguesa non está a ser debidamente recoñecida nas estatísticas da Oficina do Peregrino, ao seren sumados os seus camiñantes ao trazado galego, invisibilizando así o seu valor propio.

Esta peregrinación forma parte das Xornadas Europeas do Camiño de Santiago, promovidas polo Consello de Europa e a Federación Europea do Camiño de Santiago, no marco do recoñecemento da ruta xacobea como Itinerario Cultural Europeo dende 1987.

Esta actividade forma parte tamén do Calendario Deportivo da Eurocidade Tui Valença deste ano 2025.