Máis de 170 persoas participan na primeira edición do programa “Coida o Corpo”

Gran acollida ao novidoso programa “Coida o corpo” posto en marcha polo Concello de Tui no pasado mes de marzo en todas as parroquias tudenses, tras a experiencia piloto desenvolvida en outono en Guillarei e Ribadelouro.

Dende o pasado mes de marzo 171 persoas participan neste programa “Coida o Corpo” realizado en colaboración con Afaga, a Asociación de Familiares de Enfermos de Alzheimer e outras demencias de Galicia.  94 persoas máis están en lista de agarda, o que reflicte a boa acollida da iniciativa.

Un programa que promove o envellecemento activo a nivel físico, funcional e social. É un programa deseñado para exercitar o corpo, á vez que se fomenta a socialización dos e das participantes. A través dunha metodoloxía activa e dinámica, trabállanse habilidades como a coordinación, forza, flexibilidade e resistencia da man dos profesionais de Afaga, Miguel Vázquez, Técnico da Actividade Física e do Deporte, e Óscar Román, INEF.

O alcalde de Tui, Enrique Cabaleiro, e o presidente de AFAGA, Juan Carlos Rodríguez, deron á benvida ás persoas participantes en Coida o Corpo na parroquia de Randufe, destacando que coa posta en marcha deste programa complétase a atención integral no eido da prevención que dende o Concello de Tui se oferta ás persoas maiores de 55 anos xa que se traballa tanto na parte física, en Coida o Corpo, coma na mental, en Cultiva a mente.