Butacazero con "Iribarne"

Butacazero presentará o venres, 11 de outubro, ás 21 h “Iribarne” no Teatro Municipal de Tui.

IRIBARNE é unha investigación escénica que explora a vida dun personaxe singular, nacido durante a Monarquía de Alfonso XIII. Con tan só un ano emigra a Cuba, onde vive o soño americano. Regresa  triunfante, converténdose no fillo do alcalde. Comeza o bacharelato coa chegada da II República e, tras case converterse en cura durante a Guerra Civil, decide marchar a Madrid ao inicio da ditadura franquista, buscando seguir os pasos doutro galego ilustre.

Con ambición, chega a ocupar un cargo de Ministro baixo o mandato do Caudillo. O protagonista, sendo o mellor opositor de España, aspira a substituír ao ditador tras a súa morte, pero non logra o seu obxectivo xa que ese cargo non se obtiña por oposición, tendo que conformarse co título de Vicerrei na súa terra natal, Galicia.

A obra, a pesar de evocar a figura de Manuel Fraga, non é un biopic sobre el. Trátase dunha peza irreverente que tenta explicar o pasado recente de España a través dun político que, segundo as súas propias palabras, "dicía as verdades sen condón".

ButacaZero, a plataforma creativa de Esther F. Carrodeguas e Xavier Castiñeira, presenta esta obra no marco dun teatro que dialoga coa actualidade desde unha mirada crítica e irónica. A compañía, popularizada en 2016 coa estrea de Voaxa e Carmín na Mostra Internacional de Ribadavia, seguiu desenvolvendo proxectos diversos que abordan temas como o esquecemento, a identidade galega, a vida de María Casares, a violencia machista e a gordofobia.

A súa nova montaxe, IRIBARNE, en coprodución co Centro Dramático Nacional, marca unha nova etapa na traxectoria de ButacaZero.

Ficha Artística

• Elenco: Mónica García, Xurxo Cortázar, Anxo Outumuro, Lidia Veiga, Jorge De Arcos, e Esther F. Carrodeguas
• Coreografía e Ax. Dirección: Sabela Domínguez
• Espazo Sonoro: Berto
• Espazo Escénico: Xavier Castiñeira e Diego Valeiras
• Vestiario: Diego Valeiras
• Iluminación: Diego Vilar e Equipo Creativo Rta
• Audiovisuais: Pablo Fontenla
• Texto: Esther F. Carrodeguas
• Dirección: Xavier Castiñeira

Duración_ 3 horas (Descanso de 15 minutos)

Xénero_ Teatro

Idioma_Galego

Recomendado_ + 16 anos

Prezos_ 10€  e 7,5€