Dúas centas persoas inscribíronse para participar este domingo  na Marcha Ciclista contra a Violencia de Xénero 2021 organizada polo Concello de Tui dentro dos actos conmemorativos do 25N.

Mañá xoves, 25 de novembro, celebrarase o acto institucional, aberto á cidadanía, contra a violencia de xénero organizado polo concello de Tui con motivo do 25N, Día Internacional contra a Violencia de Xénero. Comezará ás 18 h na praza do Concello.

A prevención da violencia sexual, especialmente na mocidade, e a formación en igualdade centran este ano 2021 os actos conmemorativos do 25N, o Día Internacional contra a Violencia de Xénero que organiza o Concello de Tui.

No programa “Tui contra a violencia de xénero” empregarase a imaxe deseñada polo GDR 14 para os concellos que conforman este grupo de desenvolvemento rural.

O Concello de Tui, dentro dos actos conmemorativos do 25N, Día Internacional contra a Violencia de Xénero, organiza a Marcha Ciclista contra a Violencia de Xénero 2021. Celebrarase o domingo, 28 de novembro, ás 12 h con saída dende o Paseo da Corredoira. Será un percorrido de 7 quilómetros, de dificultade doada,  que dende o Paseo da Corredoira, irá pola Avenida da Concordia, rúa Loureiro, Veiga do Louro, praia de Areeiros, Veiga do Louro, rúa Palláns, rúa Calzada, Coengo Valiño, Alameda de San Domingos, Xardíns de Troncoso, Paseo Álvarez Blázquez e regresará ao Paseo da Corredoira.

Dende hoxe mércores, 10 de novembro, e até o martes 23 deste mes pódese visitar no anexo da Sala de Exposicións Municipal no edificio Francisco Sánchez (Área Panorámica) a exposición “Á Violencia de xénero… Dille NON!!”. Trátase dunha exposición gráfica ilustrada dirixida a axuda á mocidade a recoñecer, identificar e rexeitar condutas sexistas ou nocivas nas súas relacións.

O próximo mércores, 10 de novembro, comezará a formación ao persoal municipal do Concello de Tui en igualdade. Tanto os traballadores e traballadoras coma os concelleiros e concelleiras recibirán formación en igualdade, no marco do Programa Maruxa Mallo. A concelleira de Igualdade, Ana Mª Núñez, explica que con este programa, financiado pola Deputación de Pontevedra, o concello de Tui rende tributo á pintora surrealista galega que estivo vinculada á cidade tudense, onde pasou un tempo da súa vida.

O programa municipal de atención integral a mulleres Muller Tui vén de cumprir un ano de actividade prestando servizo  de atención psicolóxica e xurídica.

Este servizo municipal presta atención especializada a mulleres vítimas de violencia de xénero, facéndose extensivo a todas aquelas que se atopan en calquera situación de vulnerabilidade, como mulleres maiores, desempregadas, do medio rural,  con fillos/ as menores a cargo, etc. Tamén ten por obxectivo o fomento da igualdade real e efectiva entre mulleres e homes e a prevención e eliminación da violencia de xénero.

O Concello de Tui súmase á convocatoria do conxunto do movemento feminista galego e convoca unha concentración para mañá sábado, 18 de setembro, ás 20 h na Praza da Inmaculada en repulsa do feminicidio de Mónica Marcos Piñeiro, de 52 anos, na Coruña.