O Teatro Municipal de Tui encheuse onte á noite para reivindicar a igualdade  no acto institucional do 8M. Un acto que como sinalou o alcalde, Enrique Cabaleiro, se realiza dende “a plena convicción de que os poderes públicos, e os repersentantes públicos,  temos a responsabilidade de liderar, dende o discurso e dende o exemplo, as reivindicacións do movemento feminista”.  Nunha situación cunha realidade con “certos nubarróns no horizonte” desexaba o rexedor tudense que “ogallá as nosas fillas acaden unha plenitude de dereitos e liberdades”.

Homenaxe esta tarde a Manuel Lago González, no espazo sociocultural da rúa Camilo José Cela, coorganizado pola Real Academia Galega e o Concello de Tui. Este evento abre o programa conmemorativo do centenario do pasamento de Lago González.

O Teatro Municipal de Tui vai acoller mañá sábado, 8 de marzo, Día Internacional da Muller, o acto institucional organizado polo Concello de Tui para conmemorar este día. Un evento de recoñecemento que porá en valor o papel das mulleres na sociedade, recoñecendo a súa loita, talento e contribución en diferentes ámbitos.

O vindeiro martes, 18 de marzo, cúmprese o centenario do falecemento na cidade de Santiago de Compostela, na que exercía como arcebispo, do egrexio tudense Manuel Lago González (Tui, 1865 – Santiago de Compostela, 1925). Na traxectoria deste insigne eclesiástico, que tamén foi un destacado poeta, salientou sempre o seu compromiso por Galicia e a súa cultura e nomeadamente á lingua galega na que compuxo moitos dos seus versos.

Esta semana deron comezo as obras de urbanización do Paseo da Corredoira e da rúa Augusto González Besada, unha intervención destinada á recuperación deste espazo como punto de encontro e convivencia, garantindo a mellora da mobilidade peonil, a integración urbana e a renovación das infraestruturas nun contorno histórico. Trátase da Fase 1 dun proxecto que conta cun investimento de 1.165.581,54 euros, financiado con cargo do programa PON2030 da Deputación de Pontevedra. O prazo de execución estimado é de oito meses.

Tui e Salvaterra de Miño aspiran a un investimento de 10 millóns de euros de fondos europeos para a transformación do territorio e a mellora da calidade de vida da súa cidadanía, nun proxecto que marcará un antes e un despois na cooperación tranfronteireiza. Os dous municipios veñen de presentar “Cultura compartida”, un Plan de Acción Integrado, PAI, á convocatoria de axudas do Fondo Europeo de Desenvolvemento Rexional (FEDER) no marco do Programa de Crecemento Sustentable 2021-2027.

Mañá martes 25 de febreiro, ás 11.00 h ES, no novo espazo sociocultural da rúa Camilo José Cela, terá lugar a presentación da XII Eurocidade BTT, proba de ciclismo de montaña organizada pola Peña Ciclista Biciosos Rías Baixas, en colaboración coa Eurocidade Tui-Valença e a Federación Galega de Ciclismo, que se celebrará o domingo 9 de marzo.

Na mesma estarán presentes o alcalde de Tui, Enrique Cabaleiro, os responsables de Deportes de Tui e Valença, Rafael Estévez e Arlindo Sousa, e o presidente da Peña Ciclista Biciosos Rías Baixas, Eduardo Fernández.

O Concello de Tui  foi beneficiario dunha subvención por parte do Ministerio de Educación, Formación Profesional e Deportes no marco do Plan de Recuperación, Transformación e Resiliencia, financiado pola Unión Europea a través do Next Generation EU. Grazas a esta axuda, foi posible a creación dun Centro de Capacitación Dixital no municipio, fomentando a inclusión dixital e facilitando novas oportunidades de formación tecnolóxica para a veciñanza, garantindo que ningún tudense quede atrás no proceso de transformación dixital.

O alcalde do Concello de Tui, Enrique Cabaleiro, reuniuse hoxe en Santiago co director de Turismo de Galicia, Xosé Merelles, con quen abordou a importancia turística que terá a celebración do 800 aniversario da consagración da Catedral de Tui entre novembro deste ano e decembro de 2026. Xosé Merelles amosou o interese do seu departamento por apoiar esta efeméride que pretende ademais a declaración por parte do Goberno central de Acontecemento de Excepcional Interese Público. Estivo tamén presente o técnico municipal, Rafael Sánchez Bargiela. 

A Eurocidade Tui-Valença celebra trece anos de cooperación transfronteiriza cun concerto a cargo de catro formacións das dúas beiras do Miño este sábado, ás 21 h, no Teatro Municipal de Tui.

Hoxe, 10 de febreiro, cúmprense 13 anos da sinatura do protocolo entre ambas cidades co que se materializou a creación da Eurocidade plasmando a nivel institucional as relacións que dende hai séculos manteñen as poboacións tudense e valenciana.