O Concello de Tui ten recuperado estes días as pegadas dos  peregrinos que sinalan o tránsito entre España e Portugal na Ponte Internacional. Unha iniciativa da Cámara Municipal de Valença de hai xa varios anos e que polo desgaste do paso de peóns e peregrinos por este lugar tiña perdido practicamente a súa visibilidade.

A intención dos municipios tudense e valenciano é simbolizar con estas pegadas un dos atractivos do Camiño Portugués, como é o seu percorrido por dous países.

Tui prepárase para vivir un verán na rúa gozando dos diferentes eventos culturais e de lecer que se van celebrar tanto no centro urbano coma nas distintas parroquias que brindarán música en directo, danza, cinema, concursos, gastronomía,… con propostas novidosas e outras que contan con gran tradición.

O Concello de Tui súmase á conmemoración do Día Mundial da Esclerose Lateral Amiotrófica (ELA), que ten lugar mañá venres, 21 de xuño, e do Día Internacional da Síndrome de Dravet, que ten lugar este domingo, 23 de xuño.

Para iso, a fachada da Casa do Concello iluminarase de verde esta noite e de morado o domingo 23. Desta forma, o municipio únese á visibilización destas enfermidades e mostra o seu apoio ás persoas que as padecen e ás súas familias.

O Concello de Tui continua coa súa aposta polo mantemento e mellora das instalacións deportivas do municipio. Onte á tarde tivo lugar a inauguración dos novos vestiarios do CEIP de Guillarei, dos que poden gozar xa tanto o alumnado do propio centro educativo coma os e as deportistas do Club Balonmán Tui, CPA Ribex, Club Bádminton Tui, Club Tenis Tui, A Quinta de Tui FS e A Gándara F.S. que adestran nestas instalacións.

A corporación municipal de Tui reunirase mañá venres, 21 de xuño, en pleno de carácter extraordinario e urxente ás 19 h no salón de plenos da casa do concello. A orde do día é a seguinte: 

A) Parte resolutiva:

1º. Pronunciamento do Pleno sobre a urxencia relacionada co punto segundo.

2º. Expediente 1577/2024. Orzamento xeral 2024.

3º. Pronunciamento do Pleno sobre a urxencia relacionada co punto cuarto.

4º. Expediente 1978/2024. Modificación crédito nº 14. Suplemento de crédito nº 2/2024.

O Concello de Tui e ADIF avanzan no proxecto para cubrir 500 metros da vía férrea ao seu paso polo centro urbano. Este luns dende ADIF remitiron ao Concello de Tui un primeiro borrador de acordo para o tramo comprendido entre as rúas Maristas e Colón que suporía un investimento de 10 millóns de euros e tería un prazo de execución de 18 meses.

O obxectivo deste borrador de convenio é profundar nunha alternativa para cubrir as vías que permita compabilizar a modernización do ferrocarril e a mellora do servizo público e a calidade de vida da cidadanía.

Esta mañá tivo lugar na Casa do Concello de Tui unha xuntanza para a constitución da comisión organizadora do 800 aniversario da consagración da Catedral de Tui que tivo lugar o 30 de novembro de 1225. Á reunión asistiron o alcalde de Tui, Enrique Cabaleiro González, e o deán do Cabido da catedral tudense, José Diéguez Dieppa.

Mañá mércores 19, ás 18.00 horas, levarase a cabo a inauguración dos novos vestiarios do pavillón do CEIP de Guillarei, tras as obras realizadas polo Concello de Tui nesa instalación, que darán cobertura aos alumnos e alumnas do CEIP de Guillarei, nas clases de educación física, así como aos clubs deportivos tudenses que realizan os seus adestramentos e competicións nestas instalacións.

O bispo da diocese Tui -Vigo, Luís Quinteiro Fiúza visitou hoxe ao alcalde de Tui, Enrique Cabaleiro, como acto de despedida do rexedor, da cidade e do concello, nun sinxelo acto que tivo lugar na alcaldía tudense.

D. Luís Quinteiro presentou a súa renuncia diante do Papa Francisco o día 26 de xuño de 2022 aínda que continúa a fronte do bispado, coma administrador apostólico, ata o próximo día 20 de xullo, data na que tomará posesión do cargo Antonio José Valín Valdés. Na visita de hoxe asinou no libro de honra do concello e reuniuse con parte do equipo de goberno.

Ernesto Iglesias Almeida, cronista oficial de Tui, doa o seu arquivo, biblioteca e colección artísticas ao Concello de Tui.

Así se anunciou o pasado venres, 14 de xuño, na presentación do novo número da revista “Castellum Tyde”, editada polo Instituto de Estudios Tudenses co patrocinio do Concello de Tui, que precisamente está dedicado á figura deste investigador tudense.