Mañá venres, 8 de marzo, o Concello de Tui celebrará o acto conmemorativo do Día Internacional da Muller ás 18.30 h no edificio da praza da Inmaculada.

O programa previsto comezará coa actuación da recoñecida arpista directora do CRA Mestra Clara Torres, Marta Quintana, para dar paso á acción artística “Deshabitada” a cargo da actriz Nerea Brey e a videocreadora Miriam Rodríguez.  Trátase dunha proposta teatral sobre os coidados, e sobre como o feito de que estes acaben recaendo exclusivamente na muller supón unha forma máis de machismo, da que non sempre somos conscientes.

O próximo venres, 15 de marzo, celebrarase a terceira edición do Networking Mulleres Conectadas, que forma parte da programación organizada polo Concello con motivo do 8M, o Día Internacional da Muller. Este evento terá este ano carácter internacional ao abrirse a participación a mulleres tanto de España coma de Portugal a través da Eurocidade Tui-Valença. O obxectivo do networking é brindar un espazo de encontro entre mulleres empresarias, emprendedoras e directivas para crear oportunidades de negocio e exitosas colaboracións.

El cielo de los imperfectos é o título da primeira novela de Belén Varela. Mañá xoves, 7 de marzo, ás 19.30 h na Sala Félix Rodríguez, dentro da programación do 8M terá lugar un encontro coa escritora que presentará o seu libro.

“Contra o negacionismo máis feminismo” é o lema da programación organizada polo Concello de Tui con motivo do 8M, Día Internacional da Muller. A imaxe da campaña foi realizada por segundo ano consecutivo pola ilustradora Alba Casanova. Dende este xoves a casa do concello iluminarase de morado e lucirá unha pancarta coa imaxe e lema da campaña.

Tui abre a programación conmemorativa do 8M, Día Internacional da Muller, este sábado, 2 de marzo, a partir das 10.30 h no edificio da praza da Inmaculada co obradoiro “Tecendo feminismo”.

 Nesta actividade elaborarase un lazo morado, símbolo da loita feminista, en crochet da man  de MYR Lanas e coa colaboración de Katia Lanas. Non é preciso inscrición previa e poderán participar todas as persoas que o desexen até completar o aforo.

O Concello de Tui dará a coñecer nos próximo días a programación completa do 8M.

O Club de Lectura Feminista “Tempo de Mulleres” retoma a súa actividade o próximo venres 1 de marzo, ás 19 h, no edificio Francisco Sánchez. Impulsado pola concellería de Igualdade conta coa  colaboración da Asociación de Mulleres Feministas Berra e da Biblioteca Municipal. Reunirase mensualmente para compartir a lectura e análise de obras escritas por mulleres dende unha perspectiva de xénero. A data da reunión acordarase entre todas as mulleres participantes.

“Expo Cuir” é o título da exposición que Zoe Vixion presenta até o 8 de febreiro na Oficina Municipal de Turismo de Tui. Na mesma á través da fotografía reflexiona sobre os dereitos humanos, a diversidade e o respecto.

Profesional das artes escénicas, dirección, iluminación con numerosos reportaxes no seu currículo  creou unha nova marca persoal Zoe viXión a través da que coas súas reportaxes busca normalizar a colectivos. Esta mostra, que agora se presenta en Tui, foi realizada no festival Agroguir reflectindo o respecto e a diversidade coma orixe da convivencia.   

Cunha mesa redonda titulada “Sexualidade, pornografía e violencia de xénero na adolescencia” remata mañá xoves o programa da campaña “Non máis violencia por ser muller” organizada polo Concello de Tui con motivo do 25N.

A cita será ás 19 h no edificio Francisco Sánchez e vai dirixida a familias e profesionais da educación.

“A revolución feminista” é o título do encontro coa xornalista, escritora e activista feminista María Xosé Porteiro que terá lugar mañá martes, 28 de novembro, ás 19 h na sala Félix Rodríguez. Esta actividade forma parte da campaña “Non máis violencia por ser muller” organizada polo Concello de Tui con motivo 25N, o Día Internacional da Eliminación da Violencia contra a muller.

O Concello de Tui manifestou este mediodía a súa “condena absoluta ante a violencia de xénero” e reafirmou o seu compromiso “coa súa erradicación”. Así se puxo de manifesto na declaración institucional lida por membros da corporación municipal, en concreto, José Martínez Tato do BNG, Anabel Solla do PP e Sonsoles Vicente do PSdG, no acto celebrado na praza Norte da Catedral.