Centro de Interpretación do Camiño de Santiago
![Caixas de luz coa imaxe da Catedral e outros elementos patrimoniais Caixas de luz coa imaxe da Catedral e outros elementos patrimoniais](https://tui.gal/sites/default/files/styles/large/public/sites/default/files/paginas/concello-de-tui-centro-camino-santiago-4.jpg?itok=8-9m23-z)
Antero Rubín s/n
Unha das salas do antigo convento de San Domingos, na rúa Antero Rubín, acolle o Centro de interpretación "Tui, porta do camiño portugués a Santiago". O seu obxectivo é promover entre os peregrinos, os visitantes e os propios veciños de Tui o coñecemento da historia e do patrimonio vinculado na cidade ao camiño de peregrinación a Compostela. Abre de luns a venres de 16 a 22h.
A través de distintos paneis informativos, en varios idiomas, achéganse ao visitante diversos aspectos das peregrinacións xacobeas que dende os seus inicios ligaron á cidade de Tui a este Camiño de Santiago.
O hospital para peregrinos, o culto xacobeo na catedral tudense, os máis destacados peregrinos cuxo paso está documentado na cidade, e os principais enclaves do Camiño Portugués ao seu paso por Tui son recollidos na información ofertada. Amais a través dunha serie de caixas de luz se presenta o percorrido do Camiño portugués dende Valença ata Santiago de Compostela, con imaxes de gran formato sobre os principais enclaves. A exposición complétase cunha imaxe de San Roque cos atributos de peregrinos, e outros obxectos vinculados ao fenómeno xacobeo na cidade.
Tui é a porta de entrada do Camiño Portugués a Galicia, nunha ruta xacobea recoñecida como itinerario cultural europeo dende 1987.
O número de peregrinos que anualmente saen de Tui ou pasan pola cidade camiño de Compostela tense incrementando de xeito notable ao longo dos últimos anos.
O Concello de Tui conta cunha páxina en Facebook “Tui, Camino de Santiago”, onde oferta información sobre esta vía de peregrinación.