Tui ten unha clara vocación turística. A súa situación e os seus recursos naturais e patrimoniais constitúen un valor en alza. O conxunto histórico, o Camiño Portugués, o Parque Natural do Monte Aloia, o río Miño, a ruta xudía, a Eurocidade...son os eixos principais desta área. O Turismo amosase cada vez máis coma un dos principais recursos cos que contará Tui no futuro. A promoción é xa un eixo fundamental no desenvolvemento dun sector, que lentamente vai creando traballo e oportunidades na cidade. Unha tarefa na que todos deberemos implicarnos, por suposto o Concello como xestor pero tamén as empresas e os profesionais do sector.
A pouco máis de 24 horas de que se produza o eclipse solar ultímanse en Tui os preparativos para o evento organizado polo Concello de Tui no Monte das Penizas. Será unha tarde de observación astronómica, gastronomía e música en colaboración coa Comunidade de Montes de Paramos, a Deputación de Pontevedra e Turismo Rías Baixas.
Tui preparárase para vivir a eclipse solar da próxima semana cunha actividade gratuíta e aberta á cidadanía. A cita será o próximo mércores, 12 de agosto, dende ás 18 h no Monte das Penizas, en Paramos, un punto que reúne as condicións axeitadas para disfrutar deste fenómeno astronómico. O Concello de Tui organiza este evento en colaboración coa Comunidade de Montes de Paramos, a Deputación de Pontevedra e Turismo Rías Baixas.
O próximo martes, 28 de xullo, continúa o ciclo Coñece o noso patrimonio que organiza o Instituto de Estudios Tudenses coa colaboración do Concello de Tui. Será cunha nova visita, nesta ocasión a cargo da catedrática e profesora de Historia da Arte da Universidade de Santiago de Compostela, Marta Cendón Fernández titulada “Las huellas de 800 años de arte en la catedral de Tui”. Esta visita comezará no pórtico da catedral.
Mañá martes, 21 de xullo, ás 20.30 h na praza do Concello comezará a “Ruta polos lugares de memoria democrática”. Trátase da terceira visita do ciclo “Coñece o noso patrimonio” que organiza o Instituto de Estudios Tudenses, coa colaboración do Concello de Tui neste mes de xullo e no de agosto. O percorrido abranguerá diversos lugares relacionados coa memoria democrática na semana en que se cumpren 90 anos do golpe de estado do 18 de xullo de 1936 e da semana en que a cidade de Tui mantivo a súa adhesión á II República ata a entrada das tropas golpistas o 26 de xullo.
Cun percorrido polas obras escultóricas situadas en lugares públicos en Tui continúa o ciclo “Coñece o noso patrimonio” organizado polo Instituto de Estudios Tudenses, coa colaboración do Concello de Tui. Aínda que esta visita estaba inicialmente prevista para mañá martes aprázase para este mércores, 15 de xullo, ás 20.30 h con saída dende a Alameda de San Domingo.
O Camiño Portugués a Santiago é unha das rutas xacobeas con maior historia e tradición. Dende os primeiros tempos da peregrinación ten a súa entrada en Galicia a través das cidades de Valença e Tui. O pasado mes de xuño foi percorrida por 15.226 persoas, segundo os datos estatísticos recollidos pola Oficina do Peregrino da Catedral compostelá, referidos ao número que recibiron a “Compostela”. Isto supón un incremento do 19% en comparación aos datos do mesmo mes do pasado ano 2025.
Nos meses de xullo e agosto celebrarase unha nova edición do programa “Coñece o noso patrimonio” organizado polo Instituto de Estudios Tudenses que conta coa colaboración das concellerías de Turismo e Patrimonio e de Cultura do Concello de Tui.
Tras o éxito acadado nos últimos anos este verán “Coñece o noso patrimonio” abrangue un total de sete actividades e visitas guiadas a elementos patrimoniais tudenses a cargo de especialistas do propio Instituto.
Tui converterase esta fin de semana nun referente na recuperación das nosas tradicións, a música, a danza e a etnografía coa celebración do VI Festival da Cultura Tradicional e Folk, organizado pola Asociación San Telmo co apoio do Concello de Tui.
Unha exposición, un concurso e diversos concertos forman parte da programación a desenvolver este venres, sábado e domingo. Tres serán os escenarios: o Espazo Sociocultural, a praza de San Fernando e o Paseo da Corredoira.
Até finais do mes de setembro a Catedral de Tui acolle a instalación artística “Relicario” obra do tudense Carlos Fer dentro dos actos conmemorativos do 800 aniversario da consagración do templo catedralicio.
Onte á tarde tivo lugar a inauguración nun acto no que interviron o alcalde, Enrique Cabaleiro; a concelleira de Cultura, Sonsoles Vicente; o deán da Catedral, José Diéguez; o director do museo Tude, Santiago Vega; e o propio artista, Carlos Fer.
Este domingo, 5 de xullo, terá lugar a romaría de Nosa Señora das Angustias no Parque Natural Monte Aloia. Coincidindo con esta celebración o Concello de Tui promove unha camiñada ata o Monte Aloia recuperando unha vella tradición tudense que no primeiro domingo de xullo se organizaba a procesión da Virxe das Angustias dende o centro urbano ata o cumio do Aloia portando a imaxe devocional da romaría.
