Tui mostra gran dinamismo no eido da cultura, innumerables actividades o longo de todo o ano, enchen o calendario de citas de gran interese para tanto para os veciños como para os visitantes. As asociacións culturais das parroquias, os grupos de música tradicional, os coros e outros tipos de asociacións xunto co Concello conforman cada ano unha paisaxe chea de actividades de todo tipo. O teatro Municipal do edificio Francisco Sánchez e o escenario de boa parte delas, obtendo ano a ano cifras de espectadores propias de cidades de maior tamaño. Exposicións, festivais de música e cine, feiras, … fan que a cultura teña en Tui un valor excepcional.
A Eurocidade Tui-Valença conmemora o seu 13º aniversario cun evento musical que reunirá a catro formacións de ambos lados do Miño. O evento terá lugar o sábado 15 de febreiro, ás 21 h ES, no Teatro Municipal de Tui. A entrada será de balde ata completar aforo.
“Xa que o sabes, voucho contar (e cantar)” é o título do monólogo que este venres, 7 de febreiro, ás 21 h presenta Federico Pérez no Teatro Municipal de Tui dentro da programación cultural deste primeiro trimestre do ano.
O Concello de Tui fixo entrega a SOS Tomiño Baixo Miño de preto de 300 unidades de alimentos recollidos en dúas iniciativas solidarias desenvolvidas ao longo das últimas semanas.
Por unha parte a Biblioteca Municipal realizou durante o Nadal, un ano máis, o seu Mercado Solidario de Libros no que se intercambiaban libros por alimentos non perecedoiros. Foi moi ampla a variedade de libros ofertados polo centro bibliotecario tudense que se transformaron e máis dun centenar de alimentos coma pasta, lentellas, conservas, leite, ou surtidos variados.
Unha gran montaxe teatral é a que chega esta semana á Eurocidade Tui-Valença da man do Teatro Nacional São João con “Fado Alexandrino”. A cita será este venres, 31 de febreiro, ás 20 h no Teatro Municipal de Tui. As entradas están á venda en tui.gal aos prezos de 12 € e 9 €.
Tras a representación a semana pasada en Luxemburgo a compañía pecha en Tui a xira deste espectáculo que ten percorrido numerosos escenarios con esta adaptación teatral da considerada como a gran novela sobre a Revolución dos Cravos, do escritor portugués António Lobo Antunes.
Teatro, danza, música e humor forman parte da programación cultural do primeiro trimestre do ano no Teatro Municipal de Tui.
O alcalde de Tui, Enrique Cabaleiro, e a concelleira de Ensino, Cultura e Mocidade, Sonsoles Vicente, avanzaron hoxe esta programación no propio Teatro Municipal destacando a aposta que o Concello de Tui realiza presentar por unha oferta cultural de calidade, variada, estable e para todos os públicos, que ten convertido ao teatro tudense nun referente tanto en Galicia coma no Norte de Portugal.
Distintas cores, variedades, formas e tamaños da camelia locen en todo o seu esplendor hoxe e mañá no claustro da Catedral de Tui, onde este mediodía foi inaugurada a X Mostra da Camelia Cidade de Tui. O evento está organizado por ATUCA, Amigos Tudenses da Camelia, coa colaboración do Concello de Tui, xunto a outras entidades.
A Eurocidade Tui-Valença acolle o próximo 31 de xaneiro a representación de “Fado Alexandrino” da man do Teatro Nacional Nacional São João do Porto. Trátase dunha gran montaxe escénica coa que a compañía se suma aos actos conmemorativos do 50 aniversario da Revolución dos Cravos. Este espectáculo chega á Eurocidade Tui-Valença dentro da Temporada Cruzada da Programación Cultural Portugal-España: 50 anos de democracia, e conta coa colaboración do Centro Dramático Galego e do Instituto Camões.
O Claustro da Catedral de Tui acollerá esta fin de semana a X Mostra da Camelia organizada por ATUCA, Amigos Tudenses da Camelia, coa colaboración do Concello de Tui xunto a outras entidades.
Setenta e cinco expositores de Galicia, Portugal e Asturias presentarán gran variedade de camelias e outros produtos relacionados con esta flor, na que é a segunda cita do calendario anual de mostras da Sociedade Española da Camelia. A exposición tudense incide este ano na presenza precisamente da camelia na decoración do coro catedralicio datada en 1699.
O alcalde de Tui, Enrique Cabaleiro González, mantivo unha xuntanza este luns, 13 de xaneiro, co presidente da Real Academia Galega, Víctor Fernández Freixanes, e co vicesecretario da Academia, Xosé Henrique Monteagudo Romero na sede desta institución na Coruña. Tamén estivo presente o técnico municipal tudense, Rafael Sánchez Bargiela. O tema deste encontro, solicitado dende o Concello de Tui, foi a celebración, o vindeiro 18 de marzo, do centenario do falecemento do egrexio tudense Manuel Lago González, que ocupaba daquela a sede arcebispal de Santiago de Compostela.
A Biblioteca Municipal de Tui fixo entrega esta mañá, coincidindo co Día dos Usuarios das Bibliotecas, dos diplomas á vintena de persoas, na categoría infantil e adulta, que máis libros retirou en préstamo no 2024. Os lectores e lectoras recoñecidas hoxe tamén recibiron un libro como agasallo, nun acto no que participaron o alcalde, Enrique Cabaleiro, e o persoal do centro bibliotecario tudense.
Ao longo dos últimos doce meses a biblioteca tudense prestou máis de 18.279 exemplares.
