A organización da IV San Silvestre Solidaria Tudense reuniuse esta mañá para planificar a proba deportiva que se celebrará o mércores 31 de decembro, a partir das 10.30 horas. Agardan superar a cifra de participantes da edición pasada, na que máis de 1.900 persoas celebraron o fin de ano de xeito deportivo, festivo e solidario, sendo as doazóns a favor da Asociación Española Contra o Cancro.

O Concello de Tui vén de abrir o prazo de recepción de candidaturas para os Premios Deporte Tudense 2025 que se entregarán na Gala do Deporte Tudense. Este evento celebrarase o venres 28 de novembro, a partir das 20.00 horas, no Teatro Municipal de Tui.

O padexeiro tudense Iván Alonso Lage foi recibido esta mañá na casa do concello de Tui polo alcalde, Enrique Cabaleiro, e membros da corporación municipal, tras a súa participación no Campionato do Mundo de Maratón de Piragüismo e logo de anunciar a súa retirada da competición profesional. Iván Alonso conta cun amplo palmarés en competicións nacionais e internacionais sendo un referente no mundo do piragüismo.

Os padexeiros Tania Fernández e Manu Garrido, do club Kaiak Tudense, foron recibidos na casa do concello tras os éxitos acadados no Campionato do Mundo de Maratón en Hungría.  Tania Fernández subiu ao máis alto do podio ao proclamarse campioa do Mundo xunto a Tania Álvarez no K2. Mentres Manu Garrido logrou o subcampionato mundial no C2 con Jaime Duro.

Un centenar de xinetes e amazonas de Galicia e Portugal van participar esta fin de semana no Concurso Nacional de Saltos que se vai celebrar en Tui nas instalacións do Club Hípico Equigalia. É a terceira ocasión en que esta competición nacional de dúas estrelas se celebra na cidade.

Mañá mércores, 17 de setembro,  ás 12.30 horas, no Espazo Sociocultural da rúa Camilo José Cela, realizarase a presentación do Concurso Nacional de Saltos, que se celebrará esta fin de semana, organizado polo Club Hípico Equigalia, en colaboración co Concello de Tui e a Federación Hípica Galega.

Esta mañá, na rúa Olímpicos Tudenses, ao carón das instalacións de piragüismo e remo de Tui, foi presentado o Campionato de España de Radiocontrol Térmico, que se celebra en Tui esta fin de semana, o sábado 6 e o domingo 7 de setembro, no río Miño ao seu paso por Tui. Trátase dunha cita deportiva que está organizada polas federacións española e galega de motonaútica e que conta coa colaboración do Concello de Tui, a Secretaría Xeral para o Deporte da Xunta de Galicia e o Club Naútico San Telmo de Tui.