Tui conta cunha longa tradición industrial e comercial, cunha importante actividade dende inicios do século XX, marcada en boa parte polas relacións comerciais con Portugal. Na actualidade a cidade mantén esa tradición cunha presenza de comercios de diversos sectores, ao que se suma a existencia, no Parque Empresarial de Areas, dun centro comercial Outlet. Semanalmente, os xoves, celébrase un mercado nas rúas novas e no Paseo da Corredoira. Tamén o Mercado de Abastos rexistra unha importante actividade sendo os días prinicipais os xoves e os sábados.
O Mercado Municipal de San Antonio consolídase como referente na modernización do comercio de proximidade. Dentro do proxecto de reforma integral levado a cabo este espazo dotouse dun servizo innovador e pioneiro como son taquillas intelixentes que permiten a recollida de produtos fóra do horario habitual de apertura.
Tui prepárase para vivir dez días de festas na honra a San Telmo. Debido ás previsións meteorolóxicas cambia o emprazamento das primeiras actividades que se trasladan ao Mercado de San Antonio.
Así o actor, monologuista e contador de historias Avelino González, dará lectura ao pregón das festas no auditorio situado no exterior do Mercado este sábado, 19 de abril, ás 12.45 h.
A viticultura da raia ocupará un lugar destacado na primeira fin de semana das festas de San Telmo coa celebración do IV Encontro de Viños da Raia. Este evento tense consolidado en só tres edicións coma un espazo de encontro e colaboración entre pequenos produtores galegos e portugueses que elaboran os seus viños con mimo, respectando as castes autóctonas e apostando por técnicas que combinan tradición e innovación. Este evento celebrarase o sábado 19 e o domingo 20, na praza da Inmaculada, coincidindo co inicio das Festas de San Telmo 2025.
Tui reivindica o meixón coma produto singular e con gran tradición na cidade dende este venres, 11 de abril, até o luns 28 de abril, luns de San Telmo. Sete establecementos ofrecerán, previa reserva, este prezado produto na Festa do Meixón 2025
Este evento gastronómico foi presentado este mediodía no Mercado de San Antonio por parte do alcalde, Enrique Cabaleiro, a concelleira de Comercio e Turismo, Ana Núñez, os representantes dos sete establecementos participantes, os dous viveiros que subministrarán o produto, Angulas Río Miño e Delicias del Miño, e da adega Quiñóns da Insua.
O Mercado de San Antonio acollerá o próximo luns, 7 de abril, ás 11 h a presentación da Festa do Meixón.
Participarán na presentación o alcalde, Enrique Cabaleiro, a concelleira de Comercio e Turismo, Ana Núñez, membros do equipo de goberno, así coma dos sete establecementos participantes da festa, dos viveiros provedores e da adega Quiñóns da Insua.
Este mes de abril comezarán as catas maridadas de produtos locais no Mercado de San Antonio. É unha iniciativa do Concello de Tui, a través da concellaría de Turismo, que conta coa colaboración da axencia Galician Food Experience.
Tui comezou hoxe a conta atrás para as Festas de San Telmo coa presentación da programación festiva que se vai desenvolver do sábado19 ao luns 28 deste mes de abril. Dez días intensos de actividades culturais, musicais, gastronómicas, deportivas, e festivas pensadas para disfrutar en distintos espazos tanto por parte da veciñanza coma por todas aquelas persoas que visiten o municipio nestas datas.
Do sábado 19 ao luns 28 deste mes de abril celebraranse as festas patronais na honra a San Telmo en Tui. Mañá venres, 4 de abril, ás 11 h, no espazo sociocultural da rúa Camilo José Cela, presentarase a programación destes festexos.
Intervirán o alcalde, Enrique Cabaleiro, a concelleira de Cultura, Sonsoles Vicente, a concelleira de Comercio e Turismo, Ana Núñez, o concelleiro de Deportes, Rafael Estévez, xunto a outros membros do goberno municipal, e de agrupacións e artistas que van participar nas festas.
** Actualización 19/03/2025 ** Novo emprazamento no espazo sociocultural da rúa Camilo José Cela.
O sábado 22 e o domingo 23 de marzo o Claustro do Seminario Menor de Tui acollerá o Mercado Elas Facedoras, que forma parte da programación organizada polo Concello de Tui co gallo do 8M, o Día Internacional da Muller.
O Concello de Tui vén de sacar a licitación os derradeiros catro postos vacantes do Mercado de San Antonio. Dende hoxe e até o 13 de marzo as persoas interesadas poden presentar a súa solicitude por rexistro de entrada na casa do concello ou a través da Sede Electrónica do Concello de Tui.
Esta é unha oportunidade única para persoas emprendedoras e comerciantes que desexen formar parte deste mercado revitalizado, caracterizado pola súa ampla variedade de produtos e servizos diferenciadores.
