Tui despedirá mañá o ano coa celebración da IV San Silvestre Tudense, unha proba deportiva, festiva e solidaria, que reunirá a dúas mil persoas nun percorrido urbano que realizarán correndo, andando ou practicando marcha nórdica.  Dende ás 9 h e até ás 10.20 h as persoas inscritas poderán recoller o seu dorsal no Espazo Sociocultural da rúa Camilo José Cela. A proba ten carácter solidario coa Asociación Española contra o Cancro polo que aquelas persoas que desexen realizar de forma voluntaria unha doazón poderán facelo nos petos dispoñibles na recollida de dorsais.

O Concello de Tui pon en marcha unha nova campaña de promoción do comercio local neste Nadal, en concreto faino no Mercado de San Antonio.

O Mercado de San Antonio recibirá dende hoxe venres unha visita moi especial. Dende Laponia, no seu máxico trineo, chega Papa Noel para compartir momentos cheos de maxia e emoción con todos os nenos e nenas que desexen achegarse a saudalo.

Tui continúa nesta ponte festiva a percorrer o seu Camiño do Nadal repleto de luces, maxia, ilusión e música.

O Paseo da Corredoira e a Praza da Inmaculada conforman o punto central deste camiño xa que aquí se celebra o Mercado de Nadal, está situado o carrusel infantil, a casa máxica da Fada do Aloia, e se pode visitar o Belén de Mingos na Oficina de Turismo.  Este percorrido polo Nadal lévanos tamén até outros puntos da cidade coma a praza de San Fernando, e as distintas rúas e prazas iluminadas especialmente para estas datas.

Unha viaxe chea de fantasía, maxia e ilusión é a que brindará dende mañá venres o carrusel infantil instalado na praza da Inmaculada, en pleno corazón deste Nadal en Tui.

Até o 10 de xaneiro está aberto o prazo, no Concello de Tui, para presentar as solicitudes de renovación dos postos no mercado semanal que os xoves se celebra na rúa Mártires de Sobredo. As persoas vendedoras deberán presentar a solicitude no modelo normalizado, xunto coa documentación requirida.

Aquelas persoas que transcorrido o prazo de solicitude non tiveran presentado a documentación,  non poderán instalar os seus postos, en caso de facelo poderán ser sancionados segundo recolle o propio regulamento municipal de venda ambulante  

Tui prepárase para recibir ao Nadal. O próximo venres, 28 de novembro, a cidade acenderá a súa luz máis máxica e dará a benvida a estas festas cun programa que mestura tradición, creatividade e moita ilusión para grandes e pequenos.

O Mercado de San Antonio continúa a medrar e a consolidarse como un referente comercial e estratéxico en Tui e na súa contorna. O Concello abre agora a convocatoria para incorporar cinco novos proxectos empresariais, que ampliarán e diversificarán a oferta da praza, reforzando a súa vocación de servizo público e o seu papel dinamizador da economía local.

Hoxe abre o prazo de presentación de ofertas á licitación dos postos vacantes 3, 6, 7, 12 e 13 no Mercado de San Antonio destinados a carnicería, espazo gastronómico, panadería, froita e verdura, e alimentación e produtos conxelados.

Pódese ampliar esta información  na casa do concello e na sede electrónica municipal.   Tras a publicación do anuncio de licitación onte no BOPPO, as persoas interesadas teñen até o 4 de decembro para presentar as súas propostas.  

O Mercado de Nadal de Tui presenta novidades na súa edición deste ano coa ampliación do número de casetas e do espazo onde se vai celebrar, amais de potenciar a parte gastronómica habilitando un lugar para o consumo in situ.

Así o Mercado de Nadal de Tui celebrarase do 28 de novembro de 2025 ao 5 de xaneiro de 2026 con 25 casetas de madeira que se instalarán no Paseo da Corredoira, e este ano tamén na praza da Inmaculada que vén de ser remodelada.  Deste xeito crearase un percorrido máis amplo e atractivo para visitantes e expositores.