Mañá venres remata a primeira quenda do campamento de verán Igual É +
O alcalde de Tui, Enrique Cabaleiro, e a concelleira de Igualdade, Ana Núñez, agasallaron hoxe con camisetas aos nenos e nenas participantes
A primeira quenda do campamento de verán Igual É +, 2023 organizado polo Concello de Tui a través das concellerías de Deportes e Igualdade, remata mañá venres día 14.
O alcalde, Enrique Cabaleiro, e a concelleira de Igualdade, Ana María Núñez, compartiron hoxe uns minutos cos nenos e nenas interesándose polas actividades que realizaron estes días e entregándolles unhas camisetas de agasallo.
Durante estas dúas semanas os e as participantes realizaron actividades de auga, xogos populares e de equipo, xincanas polo centro de Tui, piscina, unha ruta polo Parque Natural do Monte Aloia ou kaiak no río Miño, entre outras.
O próximo luns 17 de xullo comezará a segunda quenda, que se prolongará até o 31 deste mes; a terceira será entre o 1 e o 14 de agosto; e a cuarta dende 16 até o 31 de agosto.
Lembrar que os e as participantes deberán levar roupa cómoda, unha mochila co seu nome, merenda, unha botella de auga, protección solar e gorra. O Pavillón Gustavo Rodríguez é o punto de entrega e recollida dos nenos e nenas.