Contraproduccións pecha este venres día 25 ,ás 21.30 h, no Teatro Municipal de Tui, a extensa programación de outono que se celebrou durante o pasado mes de outubro e este mes de novembro.

Contraproduccións representará ‘Cigarreiras’, un drama baseado en “La Tribuna” de Emilia Pardo Bazán. Nesta proposta dramatúrxica, con sete actrices en escena, conxuga o ton propio dun drama individual e colectivo, con outros máis frescos e lixeiros, incluso cómicos por momentos, característicos da narrativa de Pardo Bazán.

A Concellería de Ensino e Cultura do Concello de Tui convoca  unha nova edición do concurso, dirixido ao alumnado de Primaria dos centros educativos do municipio, para a elección da postal de Nadal do Concello de Tui para este ano 2022.

Este domingo, dende as 10.00 h, as rúas de Tui encheranse de cores coa celebración do VII Concurso de pintura ao aire libre “Pinta Tui”. A intención é promover e achegar o arte e a cultura aos visitantes e incentivar a dinamización turística e as actividades do Concello. Está organizado por ACITUI e Efectos, co patrocinio do Concello de Tui e distintas casas comerciais.

Este venres, 11 de novembro, ás 19.30 h, no Teatro Municipal de Tui haberá cita cinematográfica e cómica da man do filme ‘Cuñados’, unha película dirixida por Toño López.

Xosé A. Touriñán (Sabonis) e Miguel de Lira (Eduardo) dan vida aos cuñados protagonistas do filme, que meten a pata nun dos seus negocios e precisan moito diñeiro. A eles únense os actores Federico Pérez, Eva Fernández, Iolanda Muíños, María Vázquez e Mela Casal, entre outros.

O anexo da Sala Municipal de Exposicións do Concello de Tui, acollerá mañá xoves, 3 de novembro, ás 12.30 h a inauguración da exposición fotográfica “Nun lugar calquera” sobre a trata de seres humanos que poderá visitarse até o día 15 de novembro.

A exposición está organizada por ACCEM, unha organización sen ánimo de lucro, apartidista e aconfesional que traballa para mellorar as condicións de vida das persoas en situación de vulnerabilidade. Conta coa colaboración do Concello de Tui a través das súas concellerías de Servizos Sociais e Cultura.

O próximo 15 de novembro o club de lectura Tempo de Mulleres retoma a súa actividade impulsado pola concellería de Igualdade en colaboración coa Biblioteca Municipal e dinamizado pola escritora tudense Conchi Regueiro.

Esta iniciativa vai dirixida a mulleres, ofertándose un máximo de 15 prazas. As persoas interesadas deben inscribirse no correo electrónico biblioteca@tui.gal ou no teléfono 617 498 103.

Con motivo do Día da Biblioteca, que se celebrou onte 24 de outubro, a Biblioteca Municipal de Tui recibe este días unha serie de visitas de grupos escolares para coñecer as súas instalacións e servizos.

Ao longo desta semana un total de nove grupos do Colexio Maristas Santa María de Tui visitan a Biblioteca tudense para achegarse ao funcionamento deste centro bibliotecario e coñecer os seus recursos tanto de acceso á cultura como á información.

Este venres 28 de outubro, ás 19.30 h, no Teatro Municipal de Tui haberá cita para público familiar cunha obra de teatro xestual da man de Tanxarina Títeres. A compañía representará o seu espectáculo ‘A cazola de Lola’, unha obra codirixida por Cándido Pazó.

Eduardo Cunha “Tatán”, Miguel Borines e Andrés Giráldez son os tres artistas que dan vida aos monicreques de Tanxarina, e son tamén eles os que subirán ao Teatro de Tui para achegar ao público a historia de Lola.

Até o 28 de outubro o anexo da Sala Municipal acolle a exposición “Misión Atalanta”. Reúne 43 imaxes seleccionadas do libro do mesmo título editado pola Subdirección Xeral de Publicacións e Patrimonio Cultural no ano 2013. A exposición ilustra o traballo realizado polas Forzas Armadas desde 2009 na loita por erradicar a pirataría en augas do Índico.

A Sala de Exposicións Municipal, no edificio Francisco Sánchez, acolle até o 20 de novembro a exposición «Castelao grafista (facsímile)». Chega á cidade man de Afundación, a Obra Social de ABANCA, en colaboración co Concello de Tui. 

«Castelao grafista (facsímile)» reúne facsímiles da Colección de Arte Afundación, debuxos do álbum Cousas da vida de Castelao, retratos fotográficos, caricaturas e debuxos e portadas de revistas.