50 equipos participarán mañá a partir das 9 h na Eurocidade tui-Valença no 6º Budiño Raid Eurocidade, 4ª e última proba da Liga Galega de Raids de Orientación 2021 e Campionato Galego da disciplina. O evento foi presentado esta mañá na casa do Concello de Tui. Está organizado pola Asociación Deportiva A Forna de Budiño, en colaboración coa Eurocidade Tui-Valença, e subvencionado polo programa UNICIDADE Interreg España-Portugal. 

135.000 metros cadrados do Conxunto Histórico de Tui, e tamén do paseo da Corredoira e das rúas Bispo Lago e Martínez Padín, forman parte da nova Área Rexurbe que a consellería de Medio Ambiente, Territorio e Vivenda levou hoxe ao Consello da Xunta para a súa declaración.

A corporación municipal de Tui recibía onte a tarde no Salón de Plenos da Casa do Concello ao deportista tudense Gustavo Rodríguez que o pasado sábado logrou a medalla de prata en Tríatlon coma guía de Héctor Catalá nos Xogos Paralímpicos de Toquio. 

O Concello de Tui brindará hoxe mércores, 1 de setembro, unha recepción oficial ao deportista tudense Gustavo Rodríguez que o pasado sábado logrou a medalla de prata en Tríatlon coma guía de Héctor Catalá nos Xogos Paralímpicos de Toquio.

O acto está previsto para hoxe mércores ás 20 h coa recepción por parte da corporación municipal no salón de sesións da casa do concello. A continuación ás 20.15 h a cidadanía en xeral poderá transmitirlle os seus parabéns na praza do Concello.

O Descenso Internacional do Miño celebrará este sábado, 21 de agosto, a súa 50 edición. Volverá recuperar a espectacular saída dende terra en Salvaterra, ás 18.30 h, e a chegada fronte as gradas da rúa Olímpicos Tudenses en Tui, con público, tras un recorrido de algo máis de 14 quilómetros en augas do río Miño. Outra das novidades desta edición será a incorporación dunha nova modalidade, o Paddle Stand Up, que saíra quince minutos. Están inscritos 600 padeeiros de 48 clubs.

Mañá martes, 17 de agosto, ás 11.30 h na rúa Olímpicos Tudenses, terá lugar a presentación do 50 Descenso Internacional do Miño e do X Descenso Popular. Ambas probas vanse celebrar este sábado, 21 de agosto.

Dous novos parques pensados para o disfrute de toda a familia, ao combinar xogos infantís con elementos biosaudables, están xa a dispor da veciñanza.  Ambos foron financiados con cargo ao Plan Concellos da Deputación.

Dende hoxe é posible obter a Chave365 e o certificado COVID na planta Baixa da Área Panorámica. Aí vén de abrir unha oficina, atendida por unha persoa funcionaria do Servizo de Atención Primaria da Consellería de Sanidade da Xunta de Galicia. O Concello de Tui colabora así coa xerencia do SERGAS da Área Sanitaria de Vigo pondo a dispor este punto na Área Panorámica para a prestación deste servizo á cidadanía.

Hoxe veñen de ser retirados dous eucaliptos que presentaban perigo de caída na beira do río Louro, na zona de Ricamonde, por debaixo da ponte situada na estrada N550. 

A actuación foi realizada pola Confederación Hidrográfica do Miño Sil a través da empresa Tragsa. A concellería de Medio Ambiente do Concello de Tui dirixirase ao organismo de conca, que é quen ten as competencias nos leitos e zona de servidume dos ríos, solicitando a retirada destas árboles de gran porte polo risco que supoñan. 
 

O sábado 4 e o domingo 5 de setembro celebrarase en Tui a V Feira do Peregrino cun programa de actividades destinado a potenciar o Camiño de Santiago Portugués. 

A feira está organizada por ACITUI, Asociación de Comerciantes e Industriais de Tui, a Asociación Amigos do Camiño de Santiago de Tui e a Asociación Turismo Cidade de Tui , coa colaboración do Concello de Tui, a Deputación de Pontevedra, a Xunta de Galicia, Iacobus e AGACS.