Tui mostra gran dinamismo no eido da cultura, innumerables actividades o longo de todo o ano, enchen o calendario de citas de gran interese para tanto para os veciños como para os visitantes. As asociacións culturais das parroquias, os grupos de música tradicional, os coros e outros tipos de asociacións xunto co Concello conforman cada ano unha paisaxe chea de actividades de todo tipo. O teatro Municipal do edificio Francisco Sánchez e o escenario de boa parte delas, obtendo ano a ano cifras de espectadores propias de cidades de maior tamaño. Exposicións, festivais de música e cine, feiras, … fan que a cultura teña en Tui un valor excepcional.
Mañá mércores, 12 de xuño, ás 12.00 horas, no salón de plenos do Concello de Tui, terá lugar a presentación da Aloiada 2024, actividade organizada por sete dos colexios de Tui, en colaboración co Concello de Tui. Celebrarase este xoves 13 e venres 14 coa participación de máis de 160 alumnos e alumnas de 6º de Primaria, que estarán acompañados por ao redor de 40 profesores e profesoras dos centros participantes.
O 27 de xuño de 1999 inaugurábase na Alameda de San Domingos o Monumento aos Represaliados, obra do escultor Silverio Rivas, por iniciativa da Comisión cidadá pola Verdade do 36. Este mes, cando se cumpre o 25 aniversario daquela data, haberá dous actos conmemorativos. O primeiro será este sábado, 15 de xuño, na Sala Municipal no edificio Francisco Sánchez, coa inauguración dunha exposición, e o segundo o sábado 29 na propia Alameda de San Domingo.
O Anexo da Sala Municipal de Exposición, no edificio Francisco Sánchez de Tui, acolle entre dende mañá martes, 11 de xuño, e até o mércores, 19 de xuño, unha exposición colectiva de manga e cómic do alumnado do Colexio Marista “Santa María” de Tui. As obras que se presentan foron realizadas no curso extraescolar de debuxo de maga e cómic desenvolvido ao longo deste curso escolar nese centro educativo.
Un total de 178 persoas están inscritas para participar este domingo, 2 de xuño, na I Marcha Ciclista polo Medio Ambiente, organizada polo Concello de Tui como parte do programa do Día Mundial do Medio Ambiente. Esta iniciativa busca promover a conciencia ambiental e fomentar o uso da bicicleta como medio de transporte sostible.
Este sábado, 25 de maio, o Paseo da Corredoira acolle unha nova edición da “Feira do Libro Galego” que dende hai 25 edicións achega a produción editorial galega á veciñanza e lectores. Este ano as librarías locais, Librería Iris e Librería Nobel, ocuparan 15 stands onde mostrarán as novidades tanto literarias como de non ficción para nenos, mozos e adultos, cun desconto do 10%.
Ademais ao longo da xornada contarase con diversas actividades de animación.
Ante a celebración no mes de xuño da tradicional festividade de San Xoán e a previsión de realización de cacharelas as persoas interesadas deben presentar no Concello de Tui a correspondente solicitude de autorización da fogueiras.
Para iso deben presentar o impreso de solicitude, dispoñible en tui.gal, xunto coa documentación requirida, entre a que figura plano de situación e memoria descritiva, por rexistro xeral ou na sede electrónica até ás 13.30 h do 10 de xuño, tal e coma se informa nun bando da alcaldía.
Paco Nogueiras actuará mañá martes, 21 de maio, ás 18.30 h na Biblioteca Pública Municipal de Tui nunha novas actividade de animación á lectura dirixidas aos rapaces e rapazas dende 5 a 10 anos. Este evento forma parte da programación de “Tui en letras” que promove a concellería de Ensino, Cultura e Mocidade.
Até o próximo venres, 24 de maio, está aberto o prazo de matrícula nas probas de acceso a 1º de Grao Elemental no Conservatorio de Tui para o próximo curso 2024/25. As probas terán lugar o luns 10 e martes 11 de xuño nas instalación do Conservatorio Profesional de Música de Tui, na Avenida da Concordia. Van dirixidas a nenos e nenas con idades entre os 8 e os 14 anos. Realizarase unha proba de aptitude na que se valorará o sentido do ritmo, psicomotricidade e capacidade auditiva e vogal, non sendo preciso que teñan coñecementos musicais previos.
O próximo martes, 14 de maio, ás 19.00 h, a escritora Marga do Val pronunciará na Biblioteca Municipal de Tui unha conferencia titulada “Luisa Villalta, devir comunidade” dedicada á figura de Luisa Villalta a quen se lle dedica neste ano o Día das Letras Galegas.
Avanzando na programación de “Tui en Letras 2024” a Biblioteca Municipal de Tui acolle ata o vindeiro 8 de xuño a exposición itinerante “Brontë, Shakespeare y otros frikis: Clásicos que has leído sin saber que eran fantásticos”. Esta mostra pódese visitar na zona Anexo da Sala Municipal de Exposicións do Concello de Tui (Edificio “Francisco Sánchez”).
