Os valores democráticos centran o II Congreso Internacional Eurocidade e Educación

Os valores e a crise do modelo de sociedade democrática serán os temas clave no II Congreso Internacional Eurocidade e Educación que durante dúas xornadas, venres 30 e sábado 31 de xaneiro, se vai celebrar na Eurocidade Tui-Valença.

Destacadas persoas expertas en educación a nivel nacional e internacional participarán neste congreso que o venres á tarde se celebrará no auditorio da Escola Superior de Ciencias Empresariais en Valença, e o sábado, tanto en horario de mañá coma de tarde, en Tui.  

Este II Congreso Internacional Eurocidade e Educación inaugurarase o venres 30 ás 18 h no auditorio da ESCE en Valença coa participación de autoridades españolas e portuguesas. Posteriormente terá lugar o relatorio “A crise do noso modelo de sociedade democrática: razóns e perspectivas” por parte do doutor Antonio Sampaio Novoa. Será moderada por Xosé Manuel Cid da Universidade de Vigo.

Ás 20.15 h ES presentaranse experiencias socioeducativas en Valença do Minho, dentro do proxecto Escolas Bilingües e Interculturais da Fronteira.

Xa o sábado a actividade do congreso trasladarase a Tui centrándose nesta segunda xornada na crise do modelo de sociedade democrática e na intelixencia artificial.

Ás 10.15 h ES comezará a segunda conferencia do Congreso, “A crise do modelo de educación democrática. O traballo de valores” por parte do doutor Antonio Bolívar. A ponencia será moderada por Florencio Luengo, coordinador do Grupo Atlántida.

Unha hora despois presentaranse experiencias educativas en Tui, co proxecto educativo na Eurocidade; e ás 12 h ES será a quenda das experiencias socioeducativas en Tui, cos proxectos referentes que garanten os valores democráticos.

Abriranse nesta segunda xornada de Congreso tres retos. O primeiro será unha proposta de investigación para a mellora de proxectos da Eurocidade, en concreto para o pensamento docente e a presenza de estereotipos ao deseñar actividades.

O segundo reto será, na mesma liña da mellora dos proxectos da Eurocidade, centrado na xestión da tecnoloxía educativa e as claves da intelixencia artificial baseada en valores democráticos.

E o terceiro será a aprobación dun Grupo de Organización e Seguimento do III Congreso Eurocidade e Presentación da Edición Especial Deste II Congreso, na revista Cuadernos de Pedagogía.

As persoas que desexen asistir a este congreso poden ampliar a información e inscribirse na web ciberico.valedominho.com.