O alumnado do Colexio Maristas presenta unha exposición de manga e cómic
Poderase visitar dende mañá martes 11 de xuño e até o próximo mércores 19 no anexo da Sala Municipal
O Anexo da Sala Municipal de Exposición, no edificio Francisco Sánchez de Tui, acolle entre dende mañá martes, 11 de xuño, e até o mércores, 19 de xuño, unha exposición colectiva de manga e cómic do alumnado do Colexio Marista “Santa María” de Tui. As obras que se presentan foron realizadas no curso extraescolar de debuxo de maga e cómic desenvolvido ao longo deste curso escolar nese centro educativo.
As clases foron impartidas por Javier Pereira, profesor de debuxo e ilustrador free lance, que comenta que “os debuxos se realizan seguindo o método de paso a paso, mediante un bocexo previo”. As temáticas que podemos contemplar nesta mostra abrangue debuxos que van dende personaxes populares como Dragón Ball ou One Piece, ata Marvel ou series de debuxos animados.
Para a concelleira de Ensino, Cultura e Mocidade do Concello de Tui, Sonsoles Vicente Solla, a celebración desta exposición resulta de interese ao achegarnos a un estilo de debuxo, o cómic, que cada vez ten un número máis amplo de seguidores e afeccionados. Posúe esta mostra amais o interese engadido de amosar obras de alumnos e alumnas de ensino primario e secundario que se achegan por vez primeira a estas técnicas artísticas.
