Xornada de fútbol sala o luns 24 de xuño

Venres, 21 de xuño de 2013. O próximo luns 24, dende ás 16.00 horas, no Novo Pavillón Deportivo Tudense, celebrarase unha xornada de fútbol sala, na que disputaranse varios partidos entre equipos da provincia, organizado polo equipo “A Fábrica de Tui Fútbol Sala” e “A Quinta Xestión Fútbol Sala”, en colaboración co Concello de Tui.

Así, ás 16.00 horas, xogarán o equipo infantil “A Fábrica de Tui F.S.” contra “E.D. Vigo 2015”. Esta será a presentación do equipo infantil tudense, que participará a próxima tempada na liga federada.

Ás 17.00 horas, enfrontaranse os equipos de categoría alevín “C.C.R. Cabrales F.S.” e a “Escola Municipal de Valença F.S.”.

Tras este partido, ás 18.00 horas xogarase a Supercopa Cadete, entre o equipo campión de copa e subcampión de liga desta tempada, “A Fábrica de Tui F.S.” e o campión de liga “E.D. Vigo 2015”.

E para rematar esta xornada, ás 19.30 horas, disputarase a semifinal da copa galega xuvenil entre o “Vigo 2015 F.S.” e o “Burela F.S.”.

Pero antes desta xornada deportiva, este sábado 22, ás 18.00 horas, tamén no Novo Pavillón Deportivo Municipal Tudense, o equipo de fútbol sala “C.D. Tui F.S.” disputará o partido de volta na fase de ascenso á liga autonómica contra o “Prefabricados Faro” de Lalín.

O Concello de Tui desexa moita sorte ao equipo “C.D. Tui F.S.” no seu partido de ascenso á liga autonómica, así como felicita aos equipos organizadores desta xornada de fútbol sala.