Samuel Diz abre mañá venres a programación de Outono
A primeira parte do concerto estará dedicado a Bal y Gay e a segunda ao seu proxecto “On the Road”
O músico tudense Samuel Diz será o encargado de abrir mañá venres, 5 de outubro, a programación cultural de Outono no Teatro Municipal de Tui. O concerto comezará ás 21.30h. As entradas están xa á venda en www.culturatui.info ou mañá venres dende 20h no Despacho de Billetes, ao prezo de 4€ e 3€.
O concerto estará dividido en dúas partes A primeira parte xirará entorno a Jesús Bal y Gay, interpretando por primeira vez en Galicia 'Pastoral', a obra que escribiu en 1933 para Regino Sáinz de la Maza, guitarrista que estreou o Concerto de Aranxuez. Samuel Diz estreou esta obra o ano pasado tras permanecer moitos anos agochada no arquivo persoal. Logo interpretará 'Española' de Rosita García Ascot, esposa de Bal y Gay. Este venres amais Samuel Diz fará a estrea absoluta do 'Nocturnal' que Fernando Buide, compositor de Santiago, escribiu recentemente en homenaxe a Jesús Bal y Gay. Tamén interpretará a 'Suite Compostelana' de Mompou xunto a algunhas cancións populares que Lorca recuperou. Na segunda parte do concerto presentará o seu o primeiro volume do seu proxecto “On the Road” dedicado a Porto Rico no que contará amais coa participación da bailarina Gisele Creus.
O tudense Samuel Diz Sierpes comezou en Tui a súa educación musical que logo proseguiu no Conservatorio Superior de Música de Vigo, e rematou no Conservatorio Superior de Música “Manuel Castelo” de Sevilla baixo a orientación de Gaëlle Solal. Completou a súa formación musical cos continuos consellos e observacións de importantes guitarristas e mestres, destacando en especial a estreita e intensa relación con Alen Garagic, Daekun Jang e José Luís Rodrigo. Realizou o Postgrao de Xestión de Empresas da Industria Musical na Universitat Pompeu Fabra de Barcelona. Na actualidade Director de Música no Claustro, festival que se celebra anualmente no Claustro Gótico do S. I. Catedral de Tui.
Samuel Diz é considerado pola crítica como “un artista que sente a música, que vive a música, que respira a música, é a música”. Foi premiado con diferentes premios e recoñecementos internacionais, destacando a Insignia de Ouro de “Temas Sevillanos”, así como as súas actuacións en España, Italia, Portugal, Francia, Eslovenia, Estados Unidos, Porto Rico e Zimbabwe.
O pasado mes de abril publicou o seu primeiro traballo discográfico: On the Road | Porto Rico- que presentará o venres en Tui - un proxecto totalmente persoal, no que recolle a súa experiencia na illa boricue durante a súa xira americana en 2011., sendo presentado publicamente no Harare International Festival of Arts (HIFA), festival que reúne na capital de Zimbabwe (África) a máis de cen artistas de diferentes disciplinas artísticas chegados desde todos os recunchos do planeta.
Comprometido co patrimonio galego para guitarra dos últimos séculos, realiza na actualidade unha investigación sobre os guitarristas e repertorio esquecidos e/ou descoñecidos. Entre as accións xa realizadas, cabe destacar a estrea absoluta da Pastoral para guitarra de Jesús Bal e Gai(1905-1993), obra dedicada a Regino Sainz da Maza e recuperada recentemente polo musicólogo Leopoldo Neri. En recoñecemento a esta entrega e estudo, recibe o Premio “Andrés Segovia - Ruiz Morais” e é convidado por diferentes organizacións e institucións, destacando a recibida polo Council on Latin American & Iberian Studies (CLAIS) da prestixiosa Yale University.
O seu estudo e investigación sobre a figura e gravacións históricas do guitarrista sevillano Juan Antonio Torres (Premio Nacional da Música, 1973) foi editado pola Casa da Provincia de Sevilla, nun disco recompilatorio que leva por título 'Sons dunha Mocidade'. Igualmente colabora coas revistas especializadas Roseta, da Sociedade Española da Guitarra; R of Guitar, editada por Casa Ramírez, Diferenzas, do Conservatorio Superior de Música “Manuel Castelo” de Sevilla; e o foro Guitarra.Artepulsado.com
Samuel Diz en concerto
Data: Venres 5 de outubro ás 21.30h
Lugar: No Teatro Municipal
Venda de entradas: en www.culturatui.info ata o venres ás 13h ou o venres a partir das 20h no despacho de billetes, ao prezo de 4€ e 3€.