O Club Remo Tui e o Club Náutico San Telmo acadan éxitos nos Campionatos de España de Remo Olímpico e do Esquí Náutico nas categorías base
Luns, 15 de xullo de 2013. Os clubs tudenses volven a acadar novos éxitos nuns Campionatos de España, pero esta vez nas categorías base.
Se hai uns días os remeiros do Club Remo do Miño e do Club Remo Tui acadaban dous ouros e dúas pratas no Campionato de España de Remo Olímpico na categoría sénior, o pasado 7 e 8 de xullo, as remeiras do Club Remo Tui, Nuria Piña e Katia Cardoso proclamáronse subcampionas de España de Remo Olímpico, na modalidade dobre scull alevín feminino, na localidade de Banyoles (Girona).
No Campionato de España de Esquí Náutico, a tudense Silvia Leiras, proclamouse Campiona de España na categoría Sub12, no campionato celebrado a pasada fin de semana na localidade de Seseña (Toledo), onde a tamén esquiadora do Club Náutico San Telmo, Silvia Pequeño, acadou a terceira posición na categoría Sub17. Con este resultado, Silvia Leiras clasificouse para participar nunha proba internacional coa selección española, que disputarase en Milán os días 26, 27 e 28 de xullo.
No mundo do piragüismo, os padeeiros do Club Piragüismo Penedo tamén obtiveron bos resultados na Copa de España de Slalom Olímpico para xóvens promesas, xa que Ainhoa Lameiro foi ouro en C1 e bronce en K1 en Infantil feminino, mentres que Miguel Ángel Oliveros foi prata en C1 Infantil masculino e 5º no K1.
Por outra banda, o Club Kayak Tudense proclamouse Campión Galego de Piragüismo en Pista, no campionato celebrado a pasada fin de semana no encoro de Verducido (Pontevedra), demostrando que se encontra nun estado óptimo de forma de cara ao Campionato de España que se celebrará a próxima semana no mesmo escenario.
O Concello de Tui felicita as remeiras do Club Remo Tui, Nuria Piña e Katia Cardoso, polo subcampionato, así como as esquiadoras do Club Náutico San Telmo, Silvia Leiras, Campiona de España sub12 e Silvia Pequeño, terceira na categoría sub17, polos resultados acadados, que demostran que o deporte tudense ten un futuro moi prometedor na maioría das modalidades deportivas.
Felicitar tamén aos padeeiros/as e adestradores do Club Piragüismo Penedo polos resultados acadados, así como aos do Club Kayak Tudense pola consecución do campionato galego, e desexarlles moito éxito de cara ao próximo Campionato de España.