I Seminario Ibérico de Metroloxía este venres na Eurocidade Tui-Valença

Xoves, 8 de maio  de 2014 .  A Eurocidade Tui-Valença será o escenario onde se desenvolva mañá venres, 9 de maio, o I Seminario Ibérico de Metroloxía.

O Arquivo Municipal de Valença  será o escenario onde se desenvolvan as distintas conferencias ao longo da xornada. A inauguración, a cargo do alcalde de Tui Moisés Rodríguez, e do presidente da Cámara de Valença, terá lugar ás 11, hora española, contando no acto tamén coa presenza do director rexional de Economía do Norte, Eduardo Jorge Viana.

“Metroloxía:mirando cara o futuro” é o título do primeiro relatorio, ás 11.30 hora española, a cargo de José Luís Prieto Calviño, director do departamento de Calidade e de José Alfonso Mondaray Zafrilla, director do departamento Eléctrico, ambos do Laboratorio Oficial de Metroloxía de Galicia.

O programa previsto continuará ás 13.30h hora española a cargo do enxeñeiro Cartaxo Reis, exdirector de Serviços de Metrologia do IPQ.  Pola tarde, ás 15 hora española, o tema a tratar será “Erros humanos na medición” por parte de Carlos Sousa, profesor do Instituto Superior de Engenharia do Porto.  Corenta minutos despois Alberto Oubiña Dios, coordinador da área de metroloxía dimensional do Centro Tecnolóxico de Automoción de Galicia abordará o tema “Metroloxía apicada aos ensaios na automoción”.

Mentres ás 16.20 hora española Luís Lorenzo Esperante, comandante enxeñeiro de armamento e material da Direción General de Armamento y Material do Ministerio de Defensa español.

O último relatorio tratará os “Servizos municipais de Metroloxía: Auditoría da medición no ámbito da masa” por parte do enxeñeiro Joaquím Ferreira, xefe da Divisao de Qualidade e Licenciamento da Direçao Regional da Economía do Norte. Ás 18 hora española exporanse as conclusións dos traballos e media hora despois procederase á clausura do seminario.